भांगरभूंय | प्रतिनिधी
पेनसिल्व्हेनिया, खबरां संस्था ः संवसारांतलें सगळ्यांत जाण्टें जोडिल्लें जुंवळे लाॅरी आनी जॉर्ज हांकां पिरायेच्या 62 व्या वर्सा मरण आयलें. अमेरिकेंतल्या पेनसिल्व्हेनिया राज्यांतल्या लीबेनस्पर्जर फ्युनरल होमान सांगलां की, दोगांयनी 7 एप्रीलाचे रातीं पेनसिल्व्हेनिया विद्यापीठाच्या हॉस्पिटलांत निमाणो स्वास घेतलो. पूण तांच्या मरणाचें कारण स्पश्ट जावंक ना.
गिनीज बुक ऑफ वर्ल्ड रेकॉर्ड (जीडब्ल्यूआर) हांणीय सोशल मिडियाचेर केल्ल्या पोस्टा वरवीं लाॅरी आनी जॉर्ज हांच्या मरणाची पुष्टी केल्या. जॉर्ज एक येसस्वी गायक आनी ला२री एक बॉलिंग चॅम्पियन आशिल्ली.
जॉर्ज आनी लाॅरी हांचो जल्म 18 सप्टेंबर 1961 दिसा जालो. दोगांयचीय कवटी आनी रगतपेशीं अर्दवट जोडिल्ली आशिल्ली. दोगांयचो मेंदवाचो 30% वांटो वांटिल्लो आशिल्लो. पूण हें सगळें आसून लेगीत लाॅरी आनी जॉर्ज हांचे लिंग आनी करिअर वेगवेगळें आशिल्लें. जॉर्ज आनी लाॅरी एकामेकां कडेन जोडिल्ली आसली तरी दोगांयनी ही समस्या आपल्या करिअराच्या वाटेर येवंक दिली ना. 2007 त 50 व्या वाडदिसा निमतान दिल्ले मुलाखतींत लोरीन म्हणलें, आमच्या जल्माच्या वेळार दोतोरांनी आमी फकत 30 वर्सां मेरेन जियेतलीं अशें सांगिल्लें.
जॉर्जाक स्पायना बिफिडा नांवाचो दुयेंस आशिल्लो आनी तो लाॅरी परस 4 इंच ल्हान आशिल्लो. दोगांयनी पब्लिक हायस्कुलांत शिक्षण घेतलें आनी एकठांय कॉलेज पुराय केले. लाॅरी बॉलिंग खेळगडी आसली तरी 90 च्या दशकांत तिणें जायतीं वर्सां हॉस्पिटलांत कपडे धुवपाचें काम केलें. हाचे खातीर दोगांयकय जायते फावटीं आपलें वेळापत्रक बदलचें पडलें. 2007 वर्सा जॉर्ज आनी लाॅरी हें संवसारांतलें पयलेच खेपे वेगवेगळ्या लिंगांतलें जोडिल्लें जुंवळें थारलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
