भांगरभूंय | प्रतिनिधी
न्यूयाॅर्क, खबरां संस्था ः संवसारांतले जायते देश आजूनय गरीब आसात. हालींच ह्या देशांची वळेरी जाहीर जाल्या. हे वळेरेंत संवसारांतल्या १० गरीब देशांचो आस्पाव आसा. ही वळेरी दर मनशा फाटलें घरगुती उत्पन्नाच्या (जीडीपी पर कॅपिटा) आदाराचेर तयार करतात. तर पळोवया संवसारांतलो सगळ्यांत गरीब देश खंयचे ते.
दक्षीण सुदान
संवसारांतल्या गरीब देशांमदीं दक्षीण सुदान पयल्या क्रमांकाचेर आसा. हो देश कितल्याश्याच दसकां सावन अन्न, कपडे आनी आलाशिरो लेगीत जनते खातीर पुरवण करपाक शकना. खुबश्या आडमेळ्यांनी सांपडिल्ल्या ह्या देशांतल्या दरेका मनशा फाटलें वर्सुकी वट्ट घरगुती उत्पन्न फकत ४९२ डॉलर म्हळ्यार फकत ४१,१७३ रुपया आसा.
बुरुंडी
गरिबीचे नदरेन बुरुंडी नांवाचो हो उदेंत आफ्रिकेचो देश शेतवडीचो आसा. राजकीय अस्थिरताय आनी वंशीक संघर्शाक लागून ताची उदरगत जावंक ना. हांगच्या दर मनशाचें वर्सुकी उत्पन्न ९३६ डॉलर म्हळ्यार ७८,२५० रुपया. आसा.
मध्य आफ्रिकन प्रजासत्ताक
गरीब देशांचे वळेरेंत मध्य आफ्रिकन प्रजासत्ताक तिसर्या क्रमांकाचेर आसा. हिरे, लांकूड अशो जायत्यो सैमीक संपत्ती आसून लेगीत देशांत अस्थिरताय, गरिबी आनी अविकसीतपणा हांचेकडेन लढटात. हांगासर दर मनशाचें वर्सुकी उत्पन्न १,१४० डॉलर आसा जें ९५,२६१ रुपया आसा.
काँगो रिपब्लीक
सैमीक संपत्तीची गिरेस्तकाय आसून लेगीत गरीब देशांच्या वळेरेंत हो देश चवथ्या क्रमांकाचेर आसा. हो देश अर्थीक संकश्टांत आसा. राजकीय अस्थिरताय, भ्रश्टाचार आनी गैरशासन हाका लागून हो देश एक गरीब देश जाला. ह्या देशाचें दर मनशाचें वर्सुकी उत्पन्न १,५७० डॉलर म्हळ्यार १,३१,१९३ रुपया.
मोझांबीक
साक्षरताय उणी, मुळावी बांदावळ उणी जावप, तशेंच परत परत सैमीक संकश्टांक लागून देशाक अर्थीक आव्हानांक तोंड दिवचें पडटा. हो देश संवसारांतलो पांचवो गरीब देश. हांगा दर मनशाची वर्सुकी येणावळ १,६५० डॉलर आसा. म्हणल्यार १,३७,८७८ रुपया.
मलावी
शेतकी उत्पन्नाचेर आदारून आशिल्लो मलावी हो संवसारांतलो सवो गरीब देश. देशांतले गरिबीक लागून हांगा शिक्षण, वैजकी सेवा आनी मुळावी बांदावळ मर्यादीत आसा. हांगासर दर मनशाचें वर्सुकी उत्पन्न १,७१० डॉलर म्हळ्यार १,४२,८९२ रुपया.
नायझर
गरीब देशांच्या वळेरेंत नायझराचो सातवो क्रमांक आसा. शिक्षणाची पातळी उणी, वैजकी सेवा चड भार आशिल्ल्यान हो देश गरिबींत पडला. हांगाच्या दर मनशाक वर्सुकी उत्पन्न १,७३० डॉलर म्हळ्यार १,४४,५६३ रुपया.
चाड
चाड नांवाच्या देशाची अर्थवेवस्था तेल निर्यातीचेर आदारून आसा. तरी हो देश गरिबी कडेन झुजता. देखून गरीबांच्या वळेरेंत हो देश आठव्या क्रमांकाचेर आसा. हांगाच्या लोकांचें दर मनशाचें वर्सुकी उत्पन्न १,८६० डॉलर म्हळ्यार १,५५,४२७ रुपया.
लायबेरिया
लोखण आनी रबर हांच्या सैमीक उत्पादक देशां मदल्या लायबेरियाचो सगळ्यांत गरीब देशांच्या वळेरेंत ९ वे सुवातेर आस्पाव आसा. यादवी झुज, भ्रश्टाचार आनी दुबळ्या संस्थांक लागून ताका अर्थीक समस्यांक तोंड दिवचें पडटा. हांगाच्या नागरिकांचें वर्सुकी उत्पन्न १,८८० डॉलर म्हळ्यार १,५७,०९८ रुपया.
मादागास्कर
गरीब देशांचे वळेरेंत मादागास्कराचें नांव धाव्या क्रमांकाचेर आयलां. हांगाची अर्थवेवस्था शेतवडीची आसा. हांगचे लोक शेतवडींत गुंतल्या. हांगा दर मनशाक वर्सुकी उत्पादन १,९९० डॉलर म्हळ्यार १,६६,२९० रुपया इतलें उणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
