भांगरभूंय | प्रतिनिधी
फोंडेंः संजिवनी साकर कारखान्याच्या जाग्यार भाजपा सरकाराचो दोळो आसा. ताका लागून कारखानो बंद करून सरकारान शेतकारांक आनी कामगारांक वार्यार उडयल्यात, असो गंभीर आरोप काँग्रेस उमेदवार कॅप्टन विरियातो फर्नांडीस हांणी केलो.
इंडिया आघाडेचे दक्षीण गोंयचे कॉंग्रेस उमेदवार कॅप्टन फर्नांडीस हांच्या सांवड्डें मतदार भोंवडेक बरो प्रतिसाद मेळ्ळो. सांवड्डें, किर्लपाल, धारबांदोडें, मोलें, साकोड्डें आनी कुळें पंचायतीच्या भोंवडेंत लोकांनी काँग्रेस पक्षांत प्रवेश केलो. तेन्ना सबेरा संस्थेच्या तारा केरकार, सांवड्डें काँग्रेस गट समितीचे अध्यक्ष जयेश पाटील, गौतम उर्फ श्याम भंडारी, संकेत भंडारी, त्रिबेलो सौझा, राजू शिरोडकार, शाबा नायक, सुरज गरड आनी हेर कार्यकर्ते हाजीर आशिल्ले.
भाजपान फकत आस्वासनां दिवन लोकांक फटयलां. काजू बागायतदारूय अर्थीक संकश्टांत सांपडल्यात. तांकां आधारभूत किंमत दिवपाक सरकार अपेशी थारलां. खणींच्या प्रस्ना वयल्यान राज्यांत सत्तेर आयिल्ल्या सरकारान खाण अवलबितां कडेन केल्ल्ल्या फटींगपणांचो परिणाम वेंचणुकेंत दिसतलो, असो दावो फर्नांडीस हांणी केलो.
सांवड्डें काँग्रेस गट समितीचे अध्यक्ष जयेश पाटील हांणी, सांवड्डें मतदारसंघांतले लोक काँग्रेस उमेदवाराक व्हड आघाडी दिवपाक सज्ज जाल्यात. ताका लागून भाजप कार्यकर्ते कारणा शिवाय लोकांक भुलयतात, अशें सांगलें. दरेके वेंचणुके वेळार भाजप फुडारी खणी सुरु करपाचें आस्वासन दिवन लोकांक भुलयतात. फुडल्या कांय दिसांनी खणी परत सुरू करपाचें आस्वासन दिवन मतां मेळोवपाचो यत्न करतलें. ताका लागून लोकांनी असल्या प्रचारांक बळी पडचें न्हय असो उलो तांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
