भांगरभूंय | प्रतिनिधी
कानपूर : फिरोजाबादांत सरसंघचालक मोहन भागवत आशिल्ल्या रेल्वे डब्याचेर बिरेस्तारा सांजे वेळार फातर शेंवटिले. फातर थेट त्याच डब्याचेर बसलो, जातूंत ते बशिल्ले. फातर बशिल्ल्यान जनेलाचो हारसो फुटलो. भागवत कानपूरा सावन शताब्दी एक्सप्रेसींतल्यान नवी दिल्ली वताले.
भागवत एक्झिक्युटिव्ह क्लासाच्या ई-1 कोचांत आशिल्ले. रेल्वे जेन्ना मक्खनपूर- फिरोजाबाद हांच्या मदल्यान वताली. त्या वेळार अचकीत डब्याचेर नेम धरून फातर शेंवटिलो.
हे घडणुके उपरांत सुरक्षेचे नदरेन रेल्वे मदींच खंयच थांबोवंक ना. हे घडणुकेची म्हायती मेळटाच टुंडला जंक्शनाचेर रेल्वे सुरक्षा दळ आनी राजकी रेल्वे पुलिसांचे वरिश्ठ अधिकीर व्हड फौजफाट्या सयत सज्ज जाले. सांजेच्या 7.34 वरांचेर शताब्दी एक्सप्रेस टुंडला जंक्शनाच्या प्लॅटफॉर्माचेर येवन रावताच, सुरक्षा वेवस्था खूब कडक केली. टुंडला जंक्शनाचेर सुरक्षा तपासणी केले उपरांत, रेल्वे सांजेच्या 7.41 वरांचेर दिल्ली वचपाक सोडली. तेच वांगडा, आरपीएफ आनी जीआरपीच्या संयुक्त पंगडांनी मक्खनपूर- फिरोजाबाद रेल्वे मार्गाच्या भोंवतणच्या वाठारांत सोद मोहीम सुरू केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
