भांगरभूंय | प्रतिनिधी
जाॅन बॉर्जीस म्हळ्यार कोण? कितें ताचें अस्तित्व? कोण ताका वळखता? ताणें समाजांत कितें केलां? अशा साबार प्रस्नांक जाप सोदतना जॉन म्हणल्यार अशें एक व्यक्तिमत्व जाची तुळा सादारण राजकारण्या कडेन करूंक जायना असो मनीस. आयज तो राजकारणी न्हय पूण फुडाराक? सुमार 50 वर्सां आदीं नुवेंच्या पोवासांव वाड्यांत आलॅक्स आनी आल्सिना हांच्या कुटुंबांत 30 जून 1976 दिसा सकाळच्या सुमार आठ वरांचेर एक नवो सुर्या उदेलो परीपक्व भुरग्याच्या रुपान, तो जुआंव बाप्तिस्ता सुकोरो बॉर्जीस पूण तो जॉन बॉर्जीसूच म्हण नामनेक पावलो. ताचे फाटल्यान दोन भावंडां, भाव सावयो आनी भयण जेनिफा आसात. तो नुवेंच्या माय दोस पॉब्रीस हायस्कुलांत केजी तें धावी मेरेन शिकलो. ह्या काळांत ताका ताची आतेभयण सांताना, आतेभाव जोकीं आनी जेबॉय हाणीं णव्वी मेरेन शिकूंक आदार दिलो. घरांत ना टिवी ना मोबायल, भायले खेळ खेळटालो, तांतूंत आवडीचो जावन आशिल्लो फुटबॉल. समाजीक
जिविताच्यो खोंटो खायीत, व्हड मनीस जावपाच्या हावेसान, तो संघर्शांतल्यान फुडें वचत रावलो.
संघर्शाक आरंभ
भुरग्याच्या जिविताची बुनयाद धावेचे परिक्षे कडेन घडटा. देखून तातूंत बऱ्या गुणांनी पास जावंचे खातीर ताणें आपल्या मामागेर राय धांव घेतली. थंय शिक्षिका आशिल्ल्या ताच्या धाकट्या माशेनान ताका शिकोवपाची जबाबदारी स्विकारली जाल्यार जेवणा- खाणा कडेन मामी फिलोमेना ताची काळजी घेवंक लागली. ताचे तीग मामा ताका बरो करताले आनी ताणें उत्तम शिक्षण घेवंचें खातीर सगळो तेंको भासायताले.
जॉनान पयल्या वर्गांत धावी पास केली. ह्याच म्हालवजार ताका मडगांवचे चौगुले कॉलेजींत विज्ञान फांट्यांत प्रवेश मेळ्ळो. ताचो धाकटो माम दोतोर, ताका पळेवन ताच्याय मनांत दोतोर जावपाची इत्सा निर्माण जाल्ली पूण… कॉलेज म्हळ्यार नवो जागो, नवें वातावरण, नवें शिक्षण आनी नवे लोक, जॉन गोंदळ्ळो. आवा-शिवा करून ताणें बारावी पास केली पूण ते गूण फार्मासी कॉलेजींत प्रवेश घेवपा इतलेच आशिल्ले. घरचे परिस्थितीक तोंड दिवंक ताच्या व्हडल्या माशेनान ताका आदार केलो. ताचें फार्मासी शिकप सुरू जालें.
एक वटेन तो खुशाल जालो पूण तीच आदली परिस्थिती. तो परत्यान गोंदळ्ळो आनी एक वर्स फाटीं उरलो. पयलें वर्स चालू दवरतना ताका कांय इश्ट मेळ्ळे. तांणी ताका अभ्यास करपाची तरा दाखयली आनी अक्षरशा शिकयलो. विन्सी माम म्हणल्यार ताका सल्लागार कसो. तो ताच्या अडचणीं वेळार सदांच सकारात्मक बुद्द दितालो. कशी तरी ताणें फार्मासी कॉलेजीची पदवी घेतली आनी तो एक ‘फार्मासिस्ट’ जालो.
संघर्शाक नवीं पाळां
फार्मासिस्ट म्हण ताका रोखडीच सिपला कंपनींत नोकरी मेळ्ळी. पूण ती खुशालकाय चड तिगली ना. कामाचेर खूब त्रास जावंक लागिल्ल्यान ताणें स म्हयन्यां भितर नोकरी सोडून दिली. वाड्या वेले भुरगे बोटीर आसात तें पळेवन ताणेंय बोटीर वचूंक येवजिलें. ते खातीर ताणें हॉटेलाच्या अणभवाचें प्रमाणपत्र मेळयलें आनी मुलाखत दिवंक मुंबय लेगीत गेलो. पूण थंय तो नाकाम जालो. मागीर फार्मासिस्टाचे नोकरे खातीर खूब संघर्श केलो.
असोच एक दीस तो आपलीं कागदपत्रां हाडूंक पणजे वतालो. बसींत ताका ताचो इश्ट राज वैद्य मेळ्ळो. तो तेन्ना डी. सी. आय फार्मास्युटीकल्सांत आधिकारी आशिल्लो. ताणें ताका थंय आपयलो. प्राॅडक्शन ऑफीसर म्हण हुद्दो मेळ्ळो. थंयच ताच्या जिवितांत एका नशीबवंत चलयेन रीग घेतली, तें आशिल्लें रेफिया लिमा ऑलिवेरो. तांची इश्टागत वाडली आनी मोग रूप घेवंक लागलो. अकस्मात, तांचे कंपनीन एक प्राॅडक्शन दुसरे कडेन हालयलें, तांकां पगार ना जालो. आनी परत नोकरेचेर काळ आयलो. कितलीं म्हण संकटां फुडो करपाचीं?
संघर्श सोंपन सोंपना
ताचो एक इश्ट विश्वजीत नायक दुबय नोकरी करतालो. हांगां बेकार रावचे परस थंय नशीब उगडटा जाल्यार पळेवंक तो दुबय गेलो, पूण थंयसरूय कांयच जालें ना आनी ताका हात हालयत परत येवंचें पडलें. ताणें स्वताची फार्मासी घालूंक येवजिलें, पूण दुडू खंयच्यान हाडटलो? तो परत डी.सी.आय कंपनींत नोकरेक लागलो. तेन्ना लिमा थंय नाशिल्लें, तें ब्युटिशियनाचो कुर्स शिकतालें, तरी ताचे कडेन संपर्क आशिल्लो. तांची खबर लिमाच्या घरा कडेन पावली आनी तांच्या काजारा विशीं विचार सुरू जालो. पूण जॉना कडेन काजार जावंक हातांत कांयच नाशिल्लें.
संघर्शाचो घुस्मटमार
जॉनाचे अवतिकायेक ताचो भाव सावयो, जो दोतोर जाल्लो, ताणें आदाराचो हात फुडें केलो आनी ताच्या काजाराक दुडवांचो आदार लेगीत भासायलो. जॉनाच्या जिवितांत एक नवें पर्व भितर सरलें. तो काजार जालो. काजारा उपरांत लिमा एका पार्लरांत नोकरी करूंक लागलें. अशें आसतना, डी.सी.आय परत त्रासांत पडली आनी जॉनाक नोकरी वगडावची पडली. तेन्ना ताचो शेजारी संजय बॉर्जीस हाणें ताका बोटीर व्हेलो. त्या वेळार लिमा गर्भेस्त आशिल्लें.
एक दीस बोटीर आसतना देवाच्या आशिर्वादान ताका पूत जल्मला म्हण कळोवपी खुशालकायेचो फोन आयलो, ताका शेन म्हण नांव घालें. बोटीचेर त्रास जावंक लागिल्ल्यान आनीक चार म्हयन्यांनी तो बोटी वेल्यान देंवलो. अशे तरेन संघर्शात्मक जिविताच्या चडाव उतारांतल्यान तो आपलें जिवीत फुडें व्हरत रावलो, पूण ताणें केन्नाच हार मानली ना.
सुर्याचो पर्जळ पसरलो
एक दीस पर्देसांतल्यान गोंयांत परतल्लो सावयोचो इश्ट रुजारियो एक फार्मासी घालून जॉनाक थंय दवरूंक सोदता म्हण ताच्या भावान खबर हाडली. ते परस तूंच कित्याक फार्मासी घालीना, असो ताच्या भावान ताका प्रस्न केलो. भावाचें म्हण्णें ताच्या मनांत घर करून बसलें आनी ताणें हातपांय हालयले. ताच्या बऱ्या नशिबान, नुवेंच शॉप भाड्याक घेवन फार्मासी घाली. ती बरी चलूंक लागली. थोड्या तेंपान ताणें लागींच एक शॉप विकतें घेवन थंय स्पोट्स सॅन्टर चालू केलें. आतां आठ वर्सां जालीं तो ह्या धंद्यांत होली फॅमिली केमिस्ट अॅण्ड ड्रगिस्ट फार्मासी तशेंच होली फॅमिली स्पोट्स सॅन्टर चलोवन तो खुशाल जिवीत जियेता. ह्याच काळांत ताका बाय जल्मलें, तें नोराह. गांवच्या भुरग्यांक खेळां आनी संस्कृतीक मळार तो खुब आदार करता. गांवांत ताका मान आसा. ताका आमी खुब-खुब यश आवंडेतात आनी ताच्या कुटुंबाचेर आशिर्वाद मागतात.
विन्सी क्वाद्रूस
9822587498
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
