भांगरभूंय | प्रतिनिधी
संगणकाचें महत्व दिसान दीस वाडत चल्लां. जर तुमी संगणक साक्षर आसात तर ताचो बरोच लाव तुमकां मेळूं शकता. 1832 सालान चार्लस बेबेज हाणें डिजीटल प्रोग्रामेबल कंम्प्युटराचो सोद लायलो, तेन्ना संगणक सगळ्याक पातळटलो, अशें भौसाक दिसूंक नासलें. तेन्ना हांचो आकार व्हड आशिल्लो आनी काम करपाची ताकद लेगीत उणी आशिल्ली. पूण हो संगणकाचो आकार दिसान दीस ल्हान जायत गेलो, कामाची पद्दत सुदारली आनी कितलोसोच फरक पडूंक लागलो. 21 वो शेंकडो हो म्हायतीचो शेंकडो म्हूण आमी वळखतात आनी ह्या युगाक संगणकाचो उपेग तो करीत तसो आसा. हातून नोकरी मेळपाची तशेच स्वताच्या पांयांचेर उबो रावन स्वतंत्र व्यवसाय सुरु करपाची ताकत आसा. आयज तुमी घरांत येवपी वीज, उदक बीला जावं की विम्याचो हप्तो, रेल्वे, विमान आरक्षण, टॅक्सी सेवा बशिल्ले थंय करू शकतात हें सगळें संगणकाचे मजतीन जावपाक लागलें. गोंय सरकारान हें आदींच वळखलें आनी प्रत्येक शाळांनी संगणक प्रयोगशाळा सुरु केल्यो, मागीर लॅपटॉप लेगीत वांटले. आतां तर रोबोटिक कोडिंग सारके म्हत्वाचे विशय सुरु केले. हाचें फुडलें पावल म्हळ्यार सगळ्या शाळांक संगणका खातीर उपेगी पडपी साधनां लेगीत मंत्री मानेस्त निलेश काब्राल तसेच उपसभापती मानेस्त जोएल डिसोझा हांच्या उपस्थितीन दिलीं.
आयज आमकां व्हड व्हड समस्या तयार जाल्यात, त्यो संगणका वरवीं पयस करूं शकतात हाचे खातीर संगणकाचें गिन्यान विद्यार्थ्यां मेरेन पावपाक जाय. देखीक हालींच मेरशी जंक्शनाचेर गोंय सरकारान बसयिल्ली बेलटेक कंपनीची आर्टिफिशीयल इंटेलिजन्स यंत्रणा जी येरादारी खातीर आमकां खूब उपेगी जावंक शकता. ह्या भितर स्मार्ट कॅमेरा सिग्नलांक लागून येरादारी नेम तोडप्यांक दंड दिवप शक्य जातलें. हें सगळे संगणका खातीर शक्य आसा. संगणकाच्या गतीची तशेंच ताचे अचुकते विशीं आमी कल्पना करू शकनात. बशिल्ले कडेन आमकां जाय ती म्हायती मेळूं शकता. जर प्रोग्रामिंग केलें तर मनीस बळ लेगीत हाका लागना. हातून वेळ तर वांचताच, खेरीज तुमी व्हड प्रमाणान म्हायती दवरपाक शकतात. गोंय सरकारान ह्या खातीर शिक्षण खाते, उच्च शिक्षणालय आनी एस सी ई आर टी चे मुखेली शैलेश झिंगडे, विवेक कामत आनी नागराज होनेकरी हांकां जापसालदारकी दिल्या. हाच्या खातीर डॉ बॉस्को जॉर्ज हांची नेमणूक केल्या. डॉ. विजय जॉर्ज हांणी गोंयच्या सगळ्या शाळांनी शिकोवपी संगणक शिक्षकांक म्हायती प्रशिक्षण दिवपाची जापसालकी सांबाळ्ळ्या. ह्या शिक्षणांतल्यान विद्यार्थी फुडें फाटी संगणक विज्ञान हो फाटो घेवपाक शकतात. ना जाल्यार संगणका भितरलो खंयचो कोर्स करून आपली वाट सोदूं शकता.
भारतांत संगणक तीस- पस्तीस वर्सां पयलीं पावलो. आनी संगणकाचो लाव जाता हें दिसून येतकच आतां संगणका खेरीज कोणाचेंच पान पसून परतना. संगणका भितर तुमी बारावी उपरांत एम सी ए , एम एस सी, बी एस सी करू शकता, तशेच बी ई , बी टेक लेगीत करू येता. हातून जर गती येवपाची आसा तर तुमचें गणीतूय बरें आसपाक जाय. शिवाय विज्ञानाचे विशय लेगीत बरे जाय. हातून शिकतल्याक भरपूर वेळ दिवचो पडटा. कित्याक तर हातूंतलें गिन्यान बदलत आसता. तुमच्या भितर आवड निर्माण जावची हे नजरेन शाळा भितर संगणकाचे शिकोवप सुरु आसा. ह्या विषयान अभ्यासाच्या नजरेन रुची निर्माण करपाचें काम शिक्षकांचें. आपूण गेम्स खेळता, चॅटिंग करता म्हूण आपल्याक हातून अभ्यास करूंक जातलो अशें मनान धरू नाकात. संगणकाचें प्राथमिक गिन्यान ऑपरेटिंग सिस्टम एम एस वर्ड, एक्सेल पावर पॉईंट सारक्या प्रणालींचो अभ्यास करपाक जाय, हांचेर पुस्तका आसात. खेरीज कोर्स करुनय तुमी म्हायती घेवं शकतात. हे खातीर सुटयेचो उपेग जरूर करचो. तुमच्या संगणक शिक्षकाचे मार्गदर्शन जरूर घेवचें. कार्यावळ करतना ताचें मुद्रण करप, सगळ्यांक त्याच वेळार दाखोवपाची व्यवस्था करप, सगळ्या वांगडा मिटिंग करप, ह्या खेरीज तुमच्या गरजे प्रमाण संगणक आयल्यात. आता तर संगणका भितर स्वतःची बुद्धी मनीस दिवपाक लागला. सांगपाचे म्हळ्यार संगणक बऱ्याच समस्यांचेर उपाय काडूं शकता. वता वता- साखळेच्या माया एच आर सोल्यूशन कंपनीन कॉल सेंटरा खातीर उमेदवारां कडल्यान अर्ज मागयल्यात (फोन 8483079401).
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
