भांगरभूंय | प्रतिनिधी
प्रतिनिधी, दिवचल: लाखांनी भाविकांचें श्रद्धास्थान आशिल्लें, गोंय तशेंच हेर राज्यांनी फामाद आशिल्ले शिरगांवची श्री देवी लयराईची जात्रा १२ मे सावन सुरू जातली. ताचे पयलीं देवीचे धोंड व्रत स्वीकारून उपास आनी सोवळें पाळून देवीची भक्ती करतात. पांच दीस, तीन दीस धोंड व्रत स्विकारतात आनी पुरायेन सवळे पाळून देवूळ, मंडप, सैमीक वाठार, झरे, तळें अश्या सुवातांचेर रावन व्रत करतात. वाठार नितळ करून, थंय पुरायेन सोवळे पाळटात. घरांतल्यो बायलो, दादले फराळ करतात. व्रत पाळपी धोंड पांच दीस सद्दां न्हांवन ओल्या आंगार उदक, च्या, फळां घेतात. पांच दीस अलिप्त रावन सोवळे पाळप हो सोबीत अणभव अशें व्हाळशेचे यशवंत परब, दिवचलचे शेखर नायक, नवनाथ नायक, नार्वें हांणी सांगलें.
ल्हान भुरगीं तशेंच बायलोय सोवळे पाळून अग्निदिव्या खातीर सज्ज जातात. धनगरवाडी, हरिजन वाडी तशेंच विवीध सुवातांचेर भाविकांनी व्रत सुरू केलां. देवस्थान समिती, प्रशासन आनी हेर माध्यमांतल्यान शिरगांवां जात्रचे तयारेक नेट आयला. घरां सजल्यांत, दुकानां लावपाच्या कामाक सुरवात जाता. जात्रे निमतान लाखांनी भावीक जात्रेक पांचूय दीस येतात. ताचें बरे तरेन दर्शन घेवन जावचें म्हणून खुबशे उपाय केल्यात अशी म्हायती देवस्थान समितीचे अध्यक्ष गणेश गांवकार हांणी दिली.
प्रशासनान येरादारी वेवस्था आनी उदकाची वेवस्था केल्या. तशेंच पार्कींग वेवस्थे वांगडा लोकांची सुरक्षा, गर्दी करिनासतना योग्य तरेन दर्शन घेवपाक मेळचें म्हणून तांचो बंदोबस्त करपाक आढावो बसका घेतल्या. सगळ्या भाविकांनी पाञच दिसांनी देवस्थान समिती आनी प्रशासनाक पुरायेन सहकार्य करचें असो उलो अध्यक्ष गणेश गावकर हांणी मारला.
शिरगांवां तयारेक नेट आयला. देवीची तळी आनी देवळाचो वाठार तशेंच पुराय गांव सज्ज जाला. पुराय शिरगांवां उमेदीचें वातावरण आसा. हांगा व्हडली फेरी भरता. ताका लागून मिठाय आनी हेर दुकानां हांगा शेकड्यांनी लागतात. ताची सध्या तयारी चालू आसा.
हजारांनी धोंड १२ तारखेक रातचे अग्निदिव्य साकारतात आनी हो सुवाळो पळोवपाक भाविकांची गर्दी आसता. हांगा बरी वेवस्था आनी लोकांक अग्नीदिव्य प्रत्यक्षांत पळोवपाक मेळचे खातीर विशेश वेवस्था करपाक देवस्थान समिती आनी प्रशासनाचे पदाधिकारी कार्यरत जाल्यात.
बाजारांनी लाखांनी रुपयांची उलाढाल
जात्रेक पुराय गोंयचे तशेंच गोंयां लागसारच्या राज्यांतले लाखांनी भावीक येतात. ताका लागून बाजारांनी लाखांनी रुपयांची उलाढाल जायत आसता. नवे कपडे, खावपाची खाणां, जेवणांत वापरपाचें सामान, फळां, फुलां हाका खूब मागणी आसता. मोगर्यांच्या कळ्यांक ह्या दिसांनी सगळ्यांत चड मागणी आसता. गोंय तशेंच हेर राज्यांतलेय लोक मोगरीं विकपा खातीर शिरगांवां येतात. ह्या निमतान बाजारांत लाखांनी रुपयांची उलाढाल जायत आसता. दर वर्सा नव्या धोंडांची नोंदणी जाता. फाटल्या कितल्याशाच वर्सां सावन चालू आशिल्ले परंपरेंत धोंडांचो आंकडो बरोच वाडला अशें समजता.
पुराय जात्रा प्लास्टीक मुक्त
गोबी मंचुरीच्या स्टॉलांचेर हे जात्रेक पुरायेन बंदी घातल्या, अशी म्हायती गांवकार हांणी दिली. तशेंच प्लास्टिकाचो वापर जावचो न्हय म्हणून लोकांनी सहकार्य करचें आनी कपडो वा हेर पोतयांचो वापर करचो. मुळाव्या शाळेचे विद्यार्थी फाटल्या कितल्याशाच वर्सां सावन दुकानदारांक कागदाच्यो पोतयो धाडटांत. अंदूंय खुबश्या जाणांक धाडल्यात. देखून पुराय जात्रोत्सव प्लास्टीक मुक्त जावचो म्हणून देवस्थान समिती, शाळा वेवस्थापन तशेंच हेरांनी सहकार्य करचें असो उलो तांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
