भांगरभूंय | प्रतिनिधी
खालिद अहमद आनी नाहिद राणा हांच्या घातक बॉलिंगे नेटार बांगलादेशान शुक्रारा सावन सुरू जाल्ले पयले टॅस्टीच्या पयल्या दिसा श्रीलंकेचो पयलो डाव 280 धांवड्यांचेर सोंपयलो.पूण, बांगलादेशाचो लेगीत पयलो डाव गडगडलो.
बांगलादेशाची सुरवात बरी जाली ना. श्रीलंकेच्या बॉलरांनी जाकिर हसन 9, मुखेली नजमूल शान्तो 5 आनी मोमिनूल हक 5 हांकां तंबूंत धाडले. पयल्या दिसाचो खेळ सोंपलो त्या वेळार बांगलादेशान 3 बाद 32 धांवड्यो केल्यात.
श्रीलंके वतीन विश्वा फर्नांडोन दोन विकेटी घेतल्यो, जाल्यार एक विकेट कसुन रजिताक फावो जाली.
ते पयलीं बांगलादेशान टॉस जिखून पयलीं श्रीलंकेक बॅटींग करपाचें आमंत्रण दिलें. श्रीलंकेची सुरवात बरी जाली ना. 57 धांवड्यांचेर ताचे 5 बॅट्समन तंबूंत गेल्ले. ओपनर निशान मदुश्का 2, दिमुथ करुणारत्ने 17, कुशल मॅण्डिस 16 धांवड्यो करून तंबूंत परतून गेले. तांकां खालिद अहमदान बाद केले. ते उपरांत अॅंजेलो मॅथ्यूज 5 धांवड्यो करून धांवबाद जालो. दिनेश चंदीमल 9 धांवड्यो करून बाद जालो.
मुखेली धनंजय डिसिल्वा आनी कामिंडु मॅण्डिस हांणी श्रीलंकेचो डाव सांबाळ्ळो. दोगांयनी सवे विकेटी खातीर 202 धांवड्यांची भागिदारी केली. दोगांयनी शेंकड्यांची खेळी केली. तांकां नाहिद राणान बाद केले. ते उपरांत श्रीलंकेच्या एकाय बॅट्समनाक खेळपट्टीचेर तग धरपाक जमलो ना. श्रीलंकेचो डाव 68 ओव्हरींनी 280चेर सोंपलो. बांगलादेशा वतीन खालिद अहमद आनी नाहिद राणा हाणें दरेकी 3 विकेटी घेतल्यो. शोरिफुल इस्लाम आनी तैजुल इस्लाम हांकां एकेक विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
