भांगरभूंय | प्रतिनिधी
येजमान बांगलादेशा आड चालू आशिल्ले दुसरे टॅस्टीच्या तिसऱ्या दिसा श्रीलंकेन आपल्या दुसऱ्या डावांत 102 धांवड्यां भितर 6 विकेटी वगडायल्यात. पूण, तरी आसतना श्रीलंका घटमूट स्थितींत आसा. बांगलादेशाचो पयलो डाव 178 धांवड्यांचेर सोंपोवन 353 धांवड्यांची आघाडी घेतिल्ली.
तिसऱ्या दिसाचो खेळ सोंपलो त्या वेळार अणभवी बॅट्समन अॅंजेलो मॅथ्यूज 39 आनी प्रभात जयसुर्या तीन धांवड्यो करून खेळपट्टीचेर आशिल्लो. श्रीलंकेची वट्ट आघाडी 455 इतली जाल्या आनी अजून दोन दिसांचो खेळ बाकी आसा.
मजगतीं, बांगलादेशान तिसऱ्या दिसाची सुरवात 1 बाद 55 धांवड्यां वयल्यान केली. पूण, फास्ट बॉलर असिता फर्नांडोन 34 धांवड्यो दिवन चार विकेटी घेतल्यो. ताका लागून येजमान पंगड सेगीत तिसरे खेपे 200 धांवड्यां परस उण्या स्कोराचेर बाद जालो. फर्नांडो खेरीत विश्वा फर्नांडो, लाहिरु कुमारा आनी प्रभात जयसुर्या हांणें दरेकी दोन विकेटी घेतल्यो.
बांगलादेशा वतीन जाकिर हसनान सगल्यांत चड 54 धांवड्यो केल्यो. ते उपरांत थारावीक अंतरान विकेटी पडत गेल्यो.
दोन टॅस्टींचे माळेंत श्रीलंका पंगड 1-0 असो मुखार आसा. ताणें पयली मॅच 328 धांवड्यांनी जिखिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
