भांगरभूंय | प्रतिनिधी
बांगलादेश आनी श्रीलंका ह्या पंगडां मदीं चालू आशिल्ले पयले टॅस्टीच्या दुसऱ्या दिसा लेगीत बॉलरांनी आपलो शेक दवरलो. येजमान बांगलादेशाचो पयलो डाव फकत 188 धांवड्यांचेर सोंपलो. जाल्यार श्रीलंकेच्या दुसऱ्या डावाची सुरवात लेगीत बाबत जाली. ताणें आपल्यो 5 विकेटी फकत 119 धांवड्यांचेर वगडायल्यो. अशे तरेन दुसऱ्या दिसा वट्ट 12 विकेटी पडल्यो.
बांगलादेशान दुसऱ्या दिसा 3 बाद 32 धांवड्यां वयल्यान मुखार खेळपाक सुरवात केली. तैजुल इस्लामान एक बाजू बरे तरेन सांबाळून धरली आनी 47 धांवड्यो केल्यो. पूण, दुसरे वटेनच्यान ताका बरी साथ मेळूंक ना.
शहादत हुसैन आनी लिटन दास हांकां बरे सुरवातीचो फायदो घेवपाक जमलो ना. शहादत 18 आनी लिटन 25 धांवड्यो करून बाद जालो. जाल्यार मेहदी हसन फकत 11 धांवड्यो करून तंबूंत परतलो. शोरिफुल इस्लाम 15 आनी खलीद अहमद 22 धांवड्यो करून बाद जालो. श्रीलंके वतीन विश्वा फर्नांडोन तार विकेटी घेतल्यो. जाल्यार रजिथा आनी लहिरु कुमारान दरेकी 3 विकेटी घेतल्यो.
श्रीलंकेच्या दुसऱ्या डावाची सुरवात लेगीत बरी जाली ना. निशान मदुष्का फकत 10 धांवड्यो करून बाद जालो. जाल्यार कुशल मॅण्डिस लेगीत तीन धांवड्यो करून तंबूंत परतलो. अॅंजेलो मॅथ्यूजान सुरवात बरी केली. पूण, ताचो फायदो घेवन व्हड खेळी करपाक ताका जमली ना. तो 22 धांवड्यो करून तैजुल इस्लमाचो शिकार थारलो.
दिनेश चंदीमलाक खातें लेगीत उगडपाक जमलें ना. दुसऱ्या दिसाचो खेळ सोंप मेरेन श्रीलंकेन 5 विकेटी वगडावन 119 धांवड्यो केल्यात. अशे तरेन श्रीलंका वट्ट 211 धांवड्यांनी मुखार आसा. पयल्या डावांत शेंकडो मारपी मुखेली धनंजय डी सिल्वा 23 आनी विश्वा फर्नांडो 2 धांवड्यो करून खेळपट्टीचेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
