भांगरभूंय | प्रतिनिधी
म्हापशें: शेळपें- धुळेरांतलें केक शॉप आनी चिकन सेंटरांत जाल्ल्या चोरी प्रकरणांत म्हापशें पुलिसांनी दुबावीत आरोपी ईश्वर गोपी हरनीशिकारी (22, रा. गदग कर्नाटक) हाका अटक केल्या. ह्या चोरी प्रकरणांत 65 हजारांची रोख रक्कम फारायिल्ली.
पुलिसांनी सदर दुकान तशेंच वाठारांतल्या सीसीटीव्ही फुटेजीच्या आदाराचेर दुबाविताक बिरेस्तारा 18 वेर सकाळीं ताब्यांत घेतलो. सीसीटीव्ही फुटेजींत बंदिस्त जाल्ल्या दोगां पैकीं एक होच आशिल्ल्याचें दिसून आयले उपरांत ताका चोरीच्या गुन्यांवांत रितसर अटक केली. जाल्यार दुबाविताच्या वांगड्याचो सोद पुलीस घेत आसात.
मजगतीं, चोरयेची घडणूक मंगळारा 16 वेर सकाळीं 7.30 वरांच्या सुमाराक उक्तडार आयली. पयलीं चोरांनी केक आनी पेस्ट्री शॉपांत चोरी केली. दुकानाच्या शटराची मोडतोड करून दुबावितांनी भितर प्रवेश केलो आनी कवंटरांतली सुमार 4 हजार रुपयांची रोख रक्कम फारायिल्ली.
दुकान धनी सदचे प्रमाण सकाळीं 7.30 वरांचेर दुकान उगडपा खातीर आयलो तेन्ना, तांकां शटर तुटिल्लें दिसलें. उपरांत हो चोरयेचो प्रकार उक्तडार आयलो.
उपरांत लागसार आशिल्ल्या एका चिकन सेंटरांत अशेच पद्दतीन चोरी जाल्ली. चोरांनी ह्या दुकानांतले 25 हजार रुपया रोख रक्कम फारायिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
