शेतकारांच्या बळग्याक लागून देश बळिश्ट जाला ः मुंडा

भांगरभूंय | प्रतिनिधी

शेतकारां खातीर तीन सुविधा सुरू

भांगरभूंय । खबरां मेज
पणजीः केंद्रीय शेतकी आनी शेतकार कल्याण मंत्री अर्जुन मुंडा हांणी प्रधानमंत्री फसल बीमा येवजण (पीएमएफबीवाय), कृशी विमो सँडबॉक्स फ्रेमवर्क (सारथी) आनी “किसान रक्षा हेल्पलाय १४४४७ आनी पोर्टल” सुरू केलां. शेतकार समाजा खातीर वेवस्थापन प्रणाली (एलएमएस) मंच काल दिल्लींत एका सुवाळ्यान सुरू जालो. ह्या वेळार केंद्रीय शेतकी आनी शेतकार कल्याण राज्यमंत्री शोभा करंडलाजे आनी केंद्रीय शेतकी आनी शेतकार कल्याण राज्यमंत्री कैलाश चौधरी, केंद्रीय कृशी सचीव मनोज आहूजा हाजीर आशिल्ले.
मुंडा हांणी सांगलें की हो देश गांवांचो देश, शेतकारांचो देश. शेतकारांक मुखार व्हरपा खातीर प्रधानमंत्री नरेंद्र मोदी हांच्या मार्गदर्शना खाला कृशी मंत्रालय सतत वावुरता. देशाचें बळगें शेतकारांच्या बळग्याक लागून आसा. हें मतींत दवरून आनी शेतकार समाजाची प्रगती मुखार हाडपाक शेतकी आनी शेतकार कल्याण मंत्रालय वावुरता. सरकारान चलयल्ल्या येवजण्यां वरवीं शेतकारांचें उत्पन्न वाडोवन तांकां आत्मनिर्भर करपाचे यत्न सुरू आसात , अशें तांणी सांगलें. शेतकारांक डिजिटल रितीन जोडून तांकां मुखार व्हरपा खातीर वावुरचें.
कृशी मंत्रालयाच्या मुखेल येवजण्यांनी प्रधानमंत्री किसान सम्मान निधी, प्रधानमंत्री फसल बीमा येवजण हांचो आस्पाव जाता. ते भायर 10 हजार नवे शेतकार उत्पादक संघटना (एफपीओ) तयार जावपाक लागल्यात, ताचेय सकारात्मक परिणाम दिसतात. तशेंच प्रधानमंत्री शिंपणावळ कार्यावळ, राष्ट्रीय अन्न सुरक्षा मिशन, बागायती मिशन, राष्ट्रीय टिकावू शेती मिशन, किसान क्रेडीट कार्ड आदी माध्यमांतल्यान शेतकारांच्या गरजे खातीर आनी फायद्या खातीर मंत्रालय वावुरता. शेतकारांचें उत्पन्न वाडोवप आनी शेतकी कामांत धोको उणो करप हो ह्या येवजण्यांचो मुखेल हेत आसा अशें तांणी सांगलें. प्रधानमंत्री फसल बीमा येवजण हे खातीर खूब प्रभावी थारल्या. ही येवजण सुरू जाले उपरांत 15 कोटी परस चड शेतकारांनी तातूंत वांटो घेतला आनी आतां मेरेन 29,237 कोटी रुपयांच्या प्रीमियमाचेर शेतकारांक 1.52 लाख कोटी रुपया दिल्यात, अशें तांणी सांगलें.
सुरवेक प्रधानमंत्री फसल बीमा येवजणेचे सीईओ रितेश चौहान हांणी येवकार भाशण दिलें. अतिरिक्त आयुक्त (क्रेडिट) कामना शर्मा हांणी उपकार मानले.