भांगरभूंय | प्रतिनिधी
पणजी, प्रतिनिधी : शेतकारांक फटीचीं आस्वासनां दिवन भाजपान फटयलां. हाका लागून कॉंग्रेस पक्षान लोकसभा वेंचणुकेच्या जाहीरनाम्यांत किसान न्याय खाला पांच हमी दिल्यात. हातूंत शेतकी रीण मुक्त येवजण हाडप, हमी भाव कायदेशीर करप, शेतीक जीएसटींतल्यान काडप असल्या हमींचो आसपाव आसा. कॉंग्रेस एआयसीसीचे राष्ट्रीय समन्वयक शैलेश अग्रवाल हांणी बिरेस्तारा पणजे जाल्ले पत्रकार परिशदेंत ही म्हायती दिली.
भाजपान शेतकरांचें उत्पन्न दुप्पेटीन करपाचें फटीचें आस्वासन दिवन सत्ता मेळयल्या. भाजपान जाहीर केल्ल्या शेतकारांच्या विमा पॉलिसींचो फायदो शेतकारांक न्हय विमा कंपन्यांक जालो. म्हारगायेक लागून शेतकार त्रासांत पडला. कॉंग्रेसीच्या जाहीरनाम्यांत शेतकी कर्जमाफी आयोगाची स्थापना करप, फसल विमा येवजणेची परत रचणूक करप, आयात- निर्यात धोरण बदलप असल्या गजालींचो आसपाव आसा, अशें अग्रवाल हांणी फुडें म्हणलें.
भाजपाक देशांतल्या शेतकारांक न्याय दिवपाक अपेस आयलां. देखूनच शेतकारांक आदार दर तरी मेळचे खातीर आंदोलन करचें पडलें. आंदोलनांत भाजपा सरकारान शेतकारांक त्रास दिलो. आतां मेरेन हेर खंयचेंच सरकार अशें वागूंक ना. हाचे वयल्यान भाजपाची शेतकारां कडेन आशिल्ली असंवेदनशीलताय दिसून आयली, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
