भांगरभूंय | प्रतिनिधी
म्हापशें, प्रतिनिधी ः दिवचलेंतल्या लँडस्केप गोवा प्रॉपर्टी सोल्युशन्स प्रा.लि. चे फट सही वरवीं एके बायलेचे 500 शेअर्स आपल्या नांवाचेर हस्तांतरीत केल्ल्यान पुलिसांनी सिडनी बार्रेटो हाच्या आड गुन्यांव दाखल केला. दुबावीत हे कंपनीचो वेवस्थापकीय संचालक आसा.
हे संबंदी उर्वी गोपीनाथ मसूरकार (दिवचल) हांणी दिवचले पुलिशेंत कागाळ नोंद केल्या. हो फटवणुकीचो प्रकार 7 फेब्रुवारी 2018 ते 27 मार्च 2024 मजगतीं घडलो. कागाळदार बायलेन लँडस्केप गोवा प्रॉपर्टी सोल्युशन्स प्रा. लिमिटेड हे कंपनीचे शेअर्स घेतिल्ले. दुबावितान कागाळदार बायलेच्या एसएचजी फॉर्माचेर तिका फटोवपाच्या हेतान फट सही करून ती सही खरी आसा अशें दाखोवन 500 शेअर्स आपल्या नांवाचेर हस्तांतरीत केले.
हे प्रकरणांत पुलिसांनी गुन्यांव नोंद केला. फुडलो तपास उपनिरिक्षक विराज धावस्कार करतात.
मजगतीं, दुबावितान जिल्लो सत्र न्यायालयांत अटकपूर्व जामीनाचो अर्ज सादर केला आनी 15 एप्रीलाक अर्जाचेर सुनावणी जातली.
मजगतीं, दुबावीत राज्याच्या एका ज्येश्ठ मंत्र्याचो सामको लागींचो घट समर्थक आशिल्ल्याची म्हायती मुखार आयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
