भांगरभूंय | प्रतिनिधी
पणजी, प्रतिनिधीः पर्यटन खात्यान शॅक वेवसायांत मुजत वाड दिल्या. मात ही मुजत वाड हवामानाचे स्थितीचेर निंबून आसतली. केन्नाय पावस पडल्यार शॅका काडचीं पडटलीं.
वेचणुकेंक लागून अंदूचो पर्यटन हंगाम सुको गेल्लो आनी फाटले म्हयन्याचे तुळेंत ह्या म्हयन्यांत पर्यटकांच्या आंकड्यांत वाड जाल्या. देखून शॅक वेवसायांत मुदतवाड दिवपाची मागणी शॅक धनयांनी केल्ली. तशेंच बाणावलेचे आमदार वेन्झी व्हीएगस हांणीय केल्ली. कायद्या प्रमाण ३१ मे ही शॅक वेवसाय करपा खातीरची निमणी तारीख. मात शॅक धनयांची मागणी मतींत दवरून पर्यटन मंत्री रोहन खंवटे हांणी मुख्यमंत्र्या वांगडा सोमारा चर्चा केली आनी ह्या वेवसायांत मुजतवाड दिवपाचें थारायलें. हवामानाची स्थिती लक्षांत दवरून गोंय पर्यटन खात्यान शॅक धनयांक मुजतवाड दिवपाचो निर्णय घेतलो. गोंयचे सोबीत दर्यादेगेक भेट दिवपी पर्यटकांचो अणभव वाडोवपा खातीर हो निर्णय आमी घेतला, अशें पर्यटन मंत्री रोहन खंवटे हांणी सांगलें.
शॅकां खातीर मुजतवाड दिवप ही गजाल बरी आसा. पूण पावस पडल्यार शॅकां चलोवन अर्थ ना. देखून शॅक धनयांच्या हिता खातीर आनी तांकां फायदो करून दिवपा खातीर पर्यटन खात्यान फुडाराक संप्टेबरांत शॅक हंगाम सुरू करपाक जाय आनी वेळा भितर मे म्हयन्यांत तो कवळपाक जाय. नोव्हेंबर- डिसेंबर मेरेन वाट पळोवपाची न्हय, अशें गोंय परंपरीक शॅक धनी संघटणेचे अध्यक्ष मॅन्युएल कार्दोज हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
