भांगरभूंय | प्रतिनिधी
प्रतिनिधी | भांगरभूंय
हवामान खातें आनी हेर खात्यां वांगडां उलोवन शॅकांक मुदतवाड दिवपाची काय ना, हें सोमारा मेरेन थारायतले. सध्यातरी हवामानाची स्थिती पळोवन शॅक धनयांक वेवसाय करपाक सूट दिल्या. पर्यटन खातें तांकां आडखळ हाडचें ना, अशी म्हायती पर्यटन मंत्री रोहन खंवटे हांणी दिल्ली.
शॅका उबारपाक कळाव जाल्ल्यान तशेच फावो तसो धंदो जांवक नाशिल्ल्यान शॅक वेवसायांत मुदतवाड दिवपाची मागणी शॅक धनयांनी केल्ली तशेच बाणावलेचे आमदार वेन्झी व्हीएगस हांणी पर्यटन मंत्री रोहन खंवटे हांका पत्र बरोवन शॅक वेवसायात मुदतवाड दिवपाची मागणी केल्ली.
हे फाटभूंयेर उलयतांना पर्यटन मंत्री खंवटे हांणी सांगले की वेचणुकेंक लागून अंदूचो पर्यटन हंगाम सुको गेलो आनी फाटले म्हयन्याचे तुळेंत हे म्हयन्यात पर्यटकांच्या आंकड्यात वाड जाल्या. देखून शॅक संघटनेचे अध्यक्ष क्रुझ कार्दोज आनी हेर भागधारकांनी मुतवाड मागिल्ली. आमदार वेन्झी हांणी फोना वरवीं मागणी केल्ली पुण तांचे पत्र अजूनय पांवकना.
कायदे प्रमाण 31 मे ही शॅक वेवसाय करपा खातीरची निमणी तारीख. पुण हवामानाची स्थिती लक्षात घेवन आमी शॅक धारकांचे मागणेंक हयकार दिला. पुण फाल्यां पावस पडलो जाल्यार पर्यटकांक कसलेच त्रास जावचे नात हाची जतनाय घेवची, अशे मंत्री खंवटे हांणी सांगले.
हे विशीं हाव मुख्यमंत्र्या कडेन उलयलां. सोमार मेरेन पर्यटन खातें निर्णय घेतलें. हवामानाची स्थिती पळयले उपरांत शॅक वेवसाय करपाक कितले दीस मुतवाड दिवपांक मेळटा हे विशींचो निर्णय हवामान खात्या बरोबर चर्चा करून घेतले. जर वातावरण अशेंच सुके उरले जाल्यार शॅक धनयांक वेवसाय चालू दवरपांक मेळटलो. पर्यटन खाते तांकां कसलेच त्रास करचेना, अशी म्हायती खंवटे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
