भांगरभूंय | प्रतिनिधी
अध्यादेशाक मंत्रिमंडळान दिली मान्यताय
पणजी, प्रतिनिधी : शॅक हे तात्पुरते बांदकाम आशिल्ल्यान हाचे फुडें शॅका खातीर बांदकाम तशेच नगरनियोजन खात्याच्या परवान्याची गरज पडची ना. पर्यटन आनी पर्यावरण खात्यान मान्यताय दिले उपरांत शॅक उबारप शक्य जातलें. मंत्रिमंडळान हे विशींच्या अध्यादेशाक मान्यताय दिल्या. मंत्रिमंडळ बसके उपरांत मुख्यमंत्री डॉ. प्रमोद सावंत हांणी पत्रकार परिशदेंत ही म्हायती दिली.
मंत्रिमंडळाची आयज मंत्रालयांत बसका जाली. कदंब म्हामंडळा खातीर 50 नव्या इलेक्ट्रिक बशींची खरेदी जातली. वेवसायिक शुल्क खात्यान 54 नव्या पदांच्या निर्मितीक मंत्रिमंडळान मान्यताय दिल्या. वेवसायिक शुल्काची कार्यवाही जावपा खातीर ह्या पदांची भरती जातली. गोंय वैजकी म्हाविद्यालयांत सुपर स्पेशालिटी फाट्यांतल्या दोतोरांक 10 टक्के पगारवाड मेळटली. पगारवाडीक मंत्रिमंडळान मान्यताय दिल्या.
रेंवे सारख्या ‘मायनर मिनेरल्स’च्या नेमाच्या दुरूस्तीक मान्यताय दिल्या. सुटके झुजाऱ्यांच्या भुरग्यांक सरकारी नोकरेंत 2 टक्के आरक्षण आसा. येवजणेची मुजत सोंपले उपरांत 30 अर्ज आयल्यात. तांची छाननी जावन निर्णय जातलो. हे खातीर येवजणेक 28 फेब्रुवारी 2025 मेरेन मुजतवाड दिल्या, अशें डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
