भांगरभूंय | प्रतिनिधी
बॉर्डर-गावस्कर ट्रॉफीचे चवथे टॅस्टींत येजमान भारतान प्रतिहल्लो केला. तीन दिसांचो खेळ सोंपलो. ऑस्ट्रेलियेन पयल्या डावांत काडिल्ल्या 480 धांवड्यांक जाप दितना शुभमन गिलाच्या (128) शेंकड्या नेटार भारतान 3 विकेटीव गडावन 289 धांवड्यो केल्यात. ऑस्ट्रेलिये कडेन अजून 191 धांवड्यांची आघाडी आसा. आतां दोन दिसां भितर भारताक ऑस्ट्रेलियेच धांवसंख्ये परस मुखार वचपाक जाय. मॅचीचे फकत दोन दीस बाकी आसा. आनी दोनूय पंगडांचो दुसरो डाव बाकी आसा. ताका लागून ही मॅच बादाबाद उरपाची शक्यताय उप्रासल्या. तिसऱ्या दिसाचो खेळ सोंपलो त्या वेळार विराट कोहली 59 आनी रवींद्र जडेजा 16 धांवड्यो करून खेळपट्टीचेर आसा.
मजगतीं, युवा ओपनर शुभमन गिलान परिपक्वताय दाखोवन शेंकडो नोंदयलो. सगल्या फॉर्मेटांत जबरदस्त प्रदर्शन करपी गिलान पंगड वेवस्थापनाची निवड योग्य थारायली. फाटल्या मॅचींनी धांवड्यो करपाक अपेशी थारिल्ल्यान लोकेश राहुलाक पंगडांतल्यान भायर बसयला. गिलान 128 धांवड्यांची खेळी केली. हातूंत 12 चवके आनी एक सको मारलो. टॅस्ट क्रिकेटींतलो ताचो हो दुसरो टॅस्ट थारलो.
ताणें पयले विकेटी खातीर रोहित शर्मा (58 बॉलांनी 35 धांवड्यो) वांगडा 74 धांवड्यांची भागिदारी केल्या उपरांत चेतेश्वर पुजारा (121 बॉलांनी 42 धांवड्यो) वांगडा दुसरे विकेटी खातीर 113 धांवड्यांची भागिदारी केली.
गिलाचो शेंकडो सोडलो जाल्यार दुसऱ्या सत्रांत फकत 59 धांवड्यो केल्यो. हाचें मुखेल कारण म्हणल्यार बॉल पोरणो जाल्या उपरांत स्ट्रोक खेळपाक बॅट्समनांक कठीण जालें. पूण, खेळपट्टी अजून बॅट्समनां खातीर अनुकूल आसा. ऑस्ट्रेलियेच्या बॉलरांक तोंड दिवपाक गिलाक कसलीच समस्या येवंक ना.
ते पयलीं, भारतान पयल्या सत्रांत रोहित शर्माची विकेट वगडायली. बॅटिंगेक अनुकूल खेळपट्टीचेर व्हड खेळी करपाची बरी संद वगडायली. ताका मॅथ्यू कुहेनमनान बाद केलो. रोहित शर्मा फॉर्मांत दिसतालो. पूण, कुहेनमनाच्या बॉलाचेर तो बाद जालो तो विकेट मेळोवपाचो बॉल नाशिल्लो.
रोहित शर्मा भशेन चेतेश्वर पुजारा लेगीत व्हड खेळी करपाचे स्थितींत दिसतालो. पूण, च्या च्या विसवा पयलीं ताका टॉड मर्फीन एलबीडब्ल्यू बाद केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
