शीख आतंकवाद्याक मारिल्ल्याचो कॅनडाचो भारताचेर आरोप
भांगरभूंय | प्रतिनिधी
कॅनडा, खबरां संस्था: खालिस्तानी आतंकवादी हरदीप सिंग निज्जार हाका भारतान मारला असो आरोप कॅनडान केला. भारतानय ताचो प्रतिकार केलो आनी कांय वरां उपरांत कॅनडांतल्या एका वरिश्ठ अधिकाऱ्याक देश सोडपाचो आदेश दिलो. ही म्हायती परराश्ट्र मंत्रालयांतल्यान निवेदन जारी करून दिल्या.
उल्लेख केल्ल्या अधिकाऱ्याक ५ दिसां भितर भारत सोडपाचो आदेश दिला.
शीख फुडारी हरदीप सिंग निज्जार हाच्या खुनांत भारतीय गुप्तचर आनी एजंटांचो हात आसूं येता अशें कॅनडाचे प्रधानमंत्री जस्टीन ट्रूडो हांणी कॅनडियन संसदेंत म्हणलें. तांणी भारताक सरळ दोश दिलो. तशेंच कॅनडाच्या परराश्ट्र मंत्र्यानय त्याच स्वरांत भारताचेर टिका केली. हाचे उपरांत भारतान कॅनडाचे आरोप न्हयकारून निवेदन जारी केलें. खून करपाचो कॅनडान केल्लो आरोप हांसपा सारको आनी राजकी हेताचो आसा अशें भारत म्हणटा.
हरदीप सिंग निज्जार कोण आशिल्लो?
हरदीप सिंग निज्जराचो संबंद शीख फॉर जस्टीस (एसएफजे) ह्या बंदी घाल्ल्या गटा कडेन आशिल्लो. गुरूपवंतसिंह पन्नू उपरांत तो ह्या पंगडाचो दुसरो फुडारी आशिल्लो. अंदूं १८ जुना दिसा ब्रिटीश कोलंबियाच्या गुरुद्वारा भायर निज्जार हाका फारपेट करून जिवेशीं मारलो. निज्जार हो जालंधरच्या भरसिंग पुरा गांवांत रावपी आशिल्लो. १९९६ वर्सा तो कॅनडाक गेलो. ताणें कॅनडांत प्लंबर म्हणून काम करपाक सुरवात केली. पूण रोखडोच तो खलिस्तानी वावरांत घुस्पलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
