भांगरभूंय | प्रतिनिधी
शिस्त लावन बर्या मार्गाची
इश्टा, उगड दारां जिवीतांत यशाची
बेशिस्त तुजो स्वभाव
बदलून, दाखय तो मनीसपणाचो भाव….
आयज वचत थंय आमकां आयकूंक येता, आतांच्या काळार ना कोणाक कसली शिस्त, ना कोणाचोच भंय, तरणाटे
तशीच ल्हान- ल्हान भुरगीं बेशिस्त वागून वायट मार्गाची वाट धरतात. दरेक मनीस आपणाक जाय तेंच करता, आपणाक जाय तसो वागता. आपले सुवातेर तशेच भौशीक सुवातांनी तो बेशिस्तपणान वागता. वायट उतरांनी दुसर्यांच्या काळजाक भालो तोंपता. अशे तरेन जायतीं मोगाची तशींच आपलेपणाचीं नातीं इबाडलेलीं आमकां दिसून येतात. शिस्तीचे पालन करप्यांचो आंकडो दिसान दीस कमी जायत चल्ला.
शिस्त मनशाक सामकीं गरजेची. तिचे बगर कोणाच्याच जिवीताक फावो ती दिशा मेळना. ‘शिस्त’ मनशाच्या जिवीताक आकार दिता. ताका एक आदरणीय मनीस करता. मनशाक जगपाक, वागपाक, चलपाक, काम करपाक शिस्त ही आसूकूंच जाय. शिस्ती बगर जिवीत कठीण जाता. खंय तरी घुस्पता, गोंदळता आनी आडखळटा.
भुरगेपणा सावन भुरग्यांक बरे शिस्तीचें बंधन घालूंक जाय. ल्हानपणांत जे तरेन तांचेर संस्कार जातात तेच तरेन भुरगीं वाडत वतात. तांकां हे शिस्तीचो लाव व्हडपणांत जाणून येता. देखून बरी शिस्त तांकां लावप खूब गरजेचें. वायट शिस्तीच्या भुरग्यांचो फुडार वायट बुनयादीचेर आदारून आसता. तो तांचे जिवीत इबाडटा. कोणूच तांकां लागीं दवरीनात. सगलेच ताचें खरें रुप कळटकच ताचे पसून पयस रावतात.
हालींसराक दरेक मनीस शिस्ती कडेन आडनदर करतना दिसता. ह्या धांवपी संवसारांत आपलीं पोटां भरुंक जायते लोक बेशिस्तपणाचे मार्ग आपणायतात. फाटीं- फुडे पळयनासतना शिस्तीचे नेम, कायदे मोडटात आनी बेशिस्तपणान वागतात. दरेक मनीस आपसुवार्थी जाला, ताका सर्त लावंक आवडटा. तो दुसर्यांक फाटीं घालून आपूण फुडें वचपाक सोदता. दुसर्यां परस आपणाक चड मेळूंक जाय, हो विचार मनांत दवरुन ते वागतात. शाळेंत लागिल्ली शिस्त तो शाळे भायर पावतकच विसरता. ह्या बेशिस्तीक लागून जायत्यो वायट गजाली, अपघात घडून येतात.
गोंयची सोबीतकाय, सुंदरताय, संस्कृताय आमच्या दरेकाच्या बेशिस्तपणाक लागून इबाडत आसा. आमी शिस्तीचे नेम, कायदे पाळून आमचें जिवीत आनी हें गोंय सांबाळची गरज आसा. आयज पयलीं सारको गोंयचो वाठार नितळ, सुंदर दिसना. सगलेंच इबाडलां. प्रत्येक दिसा अपघात, दुयेसां, खून, आत्महत्या अश्यो गजाली कानार पडटात. लोक आपल्या घरचो कचरो मेळत थंय उडयतात. शिस्त नाशिल्ल्यान आयज आमी जिवीतांत अपयशाची आनी वायट मार्गाचीं दारां उगडल्यांत. तीं बंद करुन, बेशिस्तपणा सोडून, शिस्तीन आमच्या जिवीतांत सुदारणां हाडूंक वावरुया.
जेन्ना आमी बरी शिस्त आंगांत रिगयतले, तेन्नाच आमका जिवीतांत सूख- शांती फावो जातली आनी यशाची दारां उगडटलीं.
वायट शिस्तीचे हुमटून कांटे
बरे शिस्तीन करचें कार्य मोटे….
मिली राॅड्रिगीस
9420948573
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
