भांगरभूंय | प्रतिनिधी
शिवोले, प्रतिनिधी ः शिवोले वाठारांतल्या रस्त्यांचेर फोंडकुला आसात, ताका लागून जायते ल्हान व्हड अपघात जावपाक लागल्यात. हाका लागून ती फोंडकुला बोगोबेग पुरवाची मागणी थळाव्यांनी केल्या. ह्या वाठारांतल्या रस्त्यांची जाल्ली बाबत परिस्थिती सरकाराच्या लक्षांत हाडून दिवपा खातीर शेनवारा सकाळीं लक्ष्मीनारायण देवळा लागसारच्या जंक्शनाचेर व्हड प्रमाणांत थळावे एकठांय जाले.
ह्या वेळार शिवोले ब्लॉक काँग्रेसीची अध्यक्ष पार्वती नागवेकार, समाजसेवक कपिल कोरगांवकार, नागरीक समितीचे अध्यक्ष अमृत आगरवाडेकार, फातिमा फर्नांडीस, ग्रेगरी डिसूझा, गांव उदरगत समितीचे वांगडी आनी हेर लोक हाजीर आशिल्ले. ह्या वाठारांतल्या रस्त्याचे स्थिती विशीं नागरिकांनी खर नाराजगी उक्तायली. ह्या सुवातेर जायते ल्हान व्हड अपघात घडटात. आमदारांनी हांतूत लक्ष दिवपाची अशीं विनवणी थळाव्यांनी केली. ह्या रस्त्याच्या रुंदीकरणाचे कामूच बेकायदेशीर आसा असो दावो फातिमा फर्नांडीस हांणी केलो.
हें विशीं आमदार डिलायला लोबो हांचे कडेन संपर्क केलो तेन्ना तांणी शिवोले वाठारांतल्या रस्त्याच्या स्थिती विशीं स्पश्टीकरण दिलें. तांणी सांगलें, स म्हयन्यां आदीं आमी रस्त्याचें काम सुरू केल्लें. चोपडें शिवोले पूल ते थिएटर जंक्शन ते शिवाजी चौक मेरेन काम पुराय जाला. पावसाळ्या पयलीं थिएटर जंक्शन सावन चर्च मेरेन काम पुराय करपाचो यत्न आशिल्लो, पूण हें प्रकरण न्यायालयांत गेले उपरांत काम बंद करचें पडलें. पावसांत शिमीट काँक्रीटाचें काम केल्लें जाल्यार सध्याच्या व्हड पडपी पावसाक लागून तें व्हांवून वता आशिल्लें. थळाव्या लोकांक आनीक एक म्हयनो सोंसचे पडटले. रस्त्याच्या दोनूय वटांनी गटार आनी फुटपाथ बांदतले.
सद्या वाडी शिवोले ते शापोरा मेरेन उदकाची लायन घालपाचें काम चालू आसा. ताका लागून रस्तो खणलां आनी ह्या खातीर चालकांक त्रास जाता. ते बेगोबेग करपाचे यत्न करतलें. थळाव्यांनी हे बाबतींत सहकार्य करचें असो उलो आमदार डिलायला लोबो हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
