भांगरभूंय | प्रतिनिधी
14 वर्सां पिराये सकयले कबड्डी सर्तींत चल्यांच्या गटांत खोलपेवाडी साळ हांगाच्या शिवाजीराजे माध्यमीक विद्यालयान राज्य पांवड्याचेर वस्तादपण जोडलें. म्हापशें-पेडें खेळां संकुलाच्या मैदानाचेर मॅच जाली.
शिवाजीराजे विद्यालयान कबड्डी सर्तींत तालुको, जिल्हो आनी राज्य पांवड्याचेर आपलो शेक दवरलो. उमळशीक वाडोवपी फायनलींत ताणें मडकय फोंडेंच्या सुनंदाबाई बांदोडकार माध्यमीक विद्यालयाच्या पंगडाक हारयलो. दोनूय पंगडांनी 41-41 गूण मेळयिल्ल्यान मॅच टाय जाल्ली. उपरांत पंचांनी पांच-पांच रायड करप हे अटी प्रमाण मॅच परत सुरू जाली.
शिवाजीराजे पंगडान आठ गूण मेळयले. जाल्यार सुनंदाबाई विद्यालयान चार गूण मेळयले अशे तरेन शिवाजीराजे पंगडान चार गुणांच्या फरकान राज्य पांवड्या वयलें वस्तादपण जोडलें.
जैतिवंत पंगडांत हर्ष परब (मुखेली), रितेश देसाय, जिग्नेश तारी, युवराज परब, दीपराज राऊळ, साईराज घारे, ओंकार उमेश गवस, वैभव गावणे, बाबू शिंदे, विघ्नेश गवस, साई झोरे आनी विष्णू सावंत हांचो आस्पाव आशिल्लो. तांकां खेळां शिक्षक सचिन राऊत, खेळां शिक्षक नितीन नायक तशेंच संचित गवस, प्रज्ञेश नायक, सुमित बेतवाडकार हांचें मार्गदर्शन लाबिल्लें.
चॅरमन प्रिया राऊत, मुख्याध्यापक नागनाथ गोसावी, पालक शिक्षक संघाचे अध्यक्ष शिवानंद भोसले, शिक्षक दिलीप देसाय हांणी खेळगड्यांक परबीं भेटयलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
