भांगरभूंय | प्रतिनिधी
पणजी: महाराष्ट्राचे मुख्यमंत्री एकनाथ शिंदे हांणी थारायिल्ल्या ध्येय-धोरणां प्रमाण गोंयांत शिंदे शिवसेनेचो विस्तार करपाक शिवसेना गोंय राज्य धोरण समितीची म्हत्वाची बसका गोरेगांव (पूर्व), मुंबय जाली. ही बसका शिवसेना संपर्क फुडारी तशेंच धोरण समिती मुखेली गजानन किर्तिकर हाचे अध्यक्षते खाला जाली.
हे बसकेंत गोंय विधानसभा वेंचणुकेचे फाटभूंयेर संघटणात्मक बांधणी, प्रचार यंत्रणां, विवीध समित्यांची स्थापना आनी जापसालदारक्यांचें वाटप हाचेर चर्चा करून निर्णय घेतले.
हे बसकेक संपर्क मुखेली सुभाष सावंत, राज्य समन्वयक अरुण मोरे, राज्य मुखेली उपेंद्र गांवकार, राज्य सचीव काशिनाथ मयेंकार, जिल्लो संपर्क मुखेली उत्तर राजू पेडणेंकार, जिल्लो संपर्क मुखेली दक्षीण, दिलीप नायक, जिल्लो संपर्क मुखेली कुशावती गिरीश लोटलीकार, जिल्लो मुखेली उत्तर सुनील सांतीनेजकार, दक्षीण जिल्लो मुखेली गणबा नायक देसाय, कुशावती जिल्लो मुखेली सुहास खांडोळकार, महिला आघाडी उत्तर जिल्लो संपर्क मुखेली सुजाता मोरजकार, महिला आघाडी दक्षीण जिल्लो संपर्क मुखेली शुभांगी च्यारी, उत्तर जिल्लो समन्वयक मिलिंद प्रधान, दक्षिण जिल्लो समन्वयक प्रकाश पावसकार, कुशावती जिल्लो समन्वयक शिवप्रसाद भामरे, कुशावती जिल्हा महिला आघाडी संपर्क मुखेली सुप्रिया करंडे आनी हेर पदाधिकारी हाजीर आशिल्ले.
येवपी वेंचणुके खातीर पक्षाचो अधिकृत ‘वचननामो’ निश्चीत करपाक एक विशेश समिती करून ताचो कच्चो मसुदो रोखडोच तयार करपाचो निर्णय घेतलो.
किर्तिकर हांणी गोंयांत शिवसेनेचो भगवो आनीक घटमूट करपाक आनी येवपी वेंचणुकेंत पुराय तांकीन जैत मेळोपा खातीर सगल्या मुखेल्यांनी आनी पदाधिकार्यांनी एकवटान काम करचें, असो उलो मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
