भांगरभूंय | प्रतिनिधी
भांगरभूंय । प्रतिनिधी
केरी- सत्तरीः सत्तरी तालुक्यांत रानवटी जिवां कडल्यान शेतां तशेंच बागायती पिकांचें लुकसाण जावपाचे प्रकार सुरूच आसात. शिरोली हांगग्या वायंगण शेताची गव्या रेड्यांनी काय दिसां आदी व्हडा प्रमाणांत लुकसाण केला. पिकार आयिल्ली कणसां गव्या रेड्यांच्या एक कपळान खावून वडयल्यांत. हाका लागून शेतकारांचें बरेंच लुकसाण जालां.
पलतडवाडो शिरोली हांगच्या काशिनाथ गांवस आनी गजानन गांवस हाच्या शेतांत रायतां गवे रेडे घुसून तांणी शेताची नासाडी करून वडयली. पारंपरीक तशेंच मशिनांचो वापर करून तांणी ह्या शेतांत लागवड केल्ली. सत्तरींत केरी, शिरोली, घोटेली, रावण, मोर्लें वाठारांत अंजुणे धरणाच्या उदक खारीज बादूंन शिंपणावळी खातीर दितात. ताकाा लागून शेतकारा व्हडा प्रमाणांत वांयगण भात पीक घेतात. पयलीं पावसांत शेतां रोयताले. आता धरणाचें उदक मेळपाक लागल्ल्यान वायंगण पीक घेवपाचें प्रमाण वाडला. फाटल्या कांय वर्सां सावन रानवटी जीव शेताचे लुकसाण करपाक लागल्यात.
रानवटी प्राण्याचो बंदोबस्त करपाची मागणी शेतकार करीत आसात. मात सरकार ताचे कडेन लक्ष दिना. ताका लागून कांय शेतकारांनी बेजारून शेतां रोवपाचें सोडून दिला. शेतां आनी बागायतींक रानदुकोर, खेतीं आनी गव्यांचो चड त्रास जाता. सत्तरींतल्या गांवगिऱ्या वाठारांतले जे लोक नोकरी करतात ते वेळ काडून आपले जमनीत वेगवेगळी पिकां घेतात. माड तशेंच कुळागरां वाडल्लीं दिसतात. मिरसांग, हेर भाजीपालो लोक लायतात. गवे, रानदुकोर, मोर आनी माकड पिकावळीचें लुकसाण करतात. मात शेतकारांक सरकारा वतीन लुकसाण भरपाय दिवपा कडेन आडनदर जाता. एके वटेन शेत कृशी उत्पादन वाडयात अशें सांगता मात दुसरे वटेन पिकाची राखण करपा खातीर शेतकारांक कसलीच मजत करना अशें काशिनाथ गांवस हाणे सांगलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
