भांगरभूंय | प्रतिनिधी
म्हापशें, प्रतिनिधी ः बडये, शिरसय एका घराचेर आंब्याचें झाड कोसळून लुकसाण जालें. हे घडणुकेंत यशोदा राठोड ही बायल जखमी जाली.
चड म्हायती प्रमाण, ही घडणूक बुधवार ३ एप्रिलाक फांतोडेर ५ वरांचेर घडली. शिशू राठोड हांच्या घराचे फाटले वटेन आंब्याचें झाड आशिल्लें. तें तांच्या घराचेर कोसळ्ळें. हे घडणुके वेळार सगळे न्हिदिल्ले. आंब्याचें झाड घराचे फाटले वटेन कोसळ्ळें. हे घडणुकेची सुलूस लागतांची घरचीं सगळीं जाणां जागीं जालीं. तांणी घराचे फाटले वटेन धांव मारली. ह्या वेळार यशोदा हिचेर घराचे नळे पडून ती जखमी जाली. तिका घरच्यांनी भायर काडून रोखडेंच उपचारा खातीर हॉस्पिटलांत व्हेली. उपचार जाले उपरांत दनपरां तिका घरा धाडली.
हे विशीं म्हायती मेळटांच म्हापशें उजो पालोवपी दळाचे जवान रणजीत गांवकार, योगेश आमोणकार, लविंदर साळगांवकार, प्रवीण पिसुर्लेंकार, दत्तराज च्यारी, प्रशांत शेटगांवकार, जयेश कांदोळकार, शाहू शेळके, नितीन मयेंकार, रिचर्ड त्रिनिदाद आनी वासुदेव ताटे हांणी घडणुके सुवातेर वचून घरार पडिल्लें आंब्याचें झाड कापून कुशीक काडलें.
राठोड हांच्या घराचें सुमार १ लाखांचें लुकसाण जालां. घडणुकेची म्हायती मेळटांच शिरसय आनी थिवी पंचायतीच्या पंच वांगड्यांनी घडणुके सुवातेक भेट दिवन पळोवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
