भांगरभूंय | प्रतिनिधी
पणजी : उत्तर गोंयचे उपजिल्होधिकारी तशेंच मामलेदार हांचेर शिरगांव लयराय जात्रेच्या वेवस्थापनाची जापसालदारी आशिल्ल्यान दोन दिस जाल्ल्या म्युटेशन शिबिरांत तांकां अर्जाचेर पुराय लक्ष दिवप शक्य जालें ना. हाका लागून उत्तर गोंयांत जाल्ल्या म्युटेशन शिबिरांत फावो त्या प्रमाणांत अर्ज निकालांत काडप शक्य जालें ना. तरी लेगीत दोन दिस उत्तर गोंयांत जाल्ल्या म्युटेशन शिबिरांत २०६ अर्ज निकालांत काडपाक येस आयलें. उत्तर गोंयचे जिल्लोधिकारी अंकित यादव हांणी ही म्हायती दिली.
उत्तर गोंयांत म्युटेशनाचे २ हजारां वयर अर्ज प्रलंबीत आसात. हे अर्ज निकालांत काडपा खातीर उत्तर गोंय जिल्लोधिकार्यान खासा शिबिरांचें आयोजन केल्ले. सत्तरी, दिवचल, बार्देस, पेडणें आनी तिसवाडी मामलेदार कार्यालयांनी फाटल्या सप्तकांत दोन दिस हीं शिबिरां जाली. बार्देस म्हालांत ११६, तिसवाडी म्हालांत ४७, पेडणें म्हालांत २३ आनी सत्तरी म्हालांतले २० अर्ज निकालांत काडले.
२१ एप्रिलाक शिरगांव लयराय जात्रेच्या वेवस्थापनाची जापसालदारी प्रशासनाचेर आशिल्ली. मामलेदार, उपजिल्लोधिकारी गर्देचें नियंत्रण करपी कामांत व्यस्त आशिल्ले. हाका लागून म्युटेशन शिबीरा कडेन पुराय तरेन अधिकार्यांक लक्ष दिवप शक्य जालें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
