भांगरभूंय | प्रतिनिधी
आमदार प्रेमेंद्र शेट हांणी केलो तयारेचो नियाळ सादर
पणजी : शिरगांवचे होमखण जात्रेचे फाटभुंयेर प्रशासनान भक्तांच्या सुरक्षे खातीर पावलां उबारल्यांत. तशेंच थळावे आमदार प्रेमेंद्र शेट हांणी तयारेचो नियाळ सादर केलो. फाटल्या वर्सा जात्रेक जंय खेटाखेटीची घडणूक घडिल्ली तो रस्तो रुंद आनी समांतर करपाचें काम प्राधान्यान पुराय जालां अशें तांणी ह्या वेळार स्पश्ट केलें. भक्तांक कसलीच आडमेळीं नासतना दर्शन करपाक मेळचें म्हणून हें म्हत्वाचें पावल उबारलां.
आमदार शेट हांणी दिल्ले तंत्रीक म्हायती प्रमाण संबंदीत रस्त्याची देंवती १ मिटर उणी केल्या आनी आदली ४.२ मिटर रुंदाय आतां ६.५ मिटरां मेरेन वाडयल्या. तशेंच रस्त्या कुशीक राखणे वणटी उबारल्यात. अंदूं भक्तांक ‘अग्निदिव्य’ सुवातेर सुरक्षीतपणान प्रवेश मेळचो हे खातीर खाशेली वेवस्था केल्या. जात्रेच्या वेळार गर्दीचेर नियंत्रण दवरपा खातीर प्रशासन सगली जतनाय घेता, अशेंय तांणी नमून केलें.
मजगतीं, दुसरे वटेन श्री देवी लयराई जत्रेचे सुरक्षितताये संबंदी याचिकेचेर बुधवारा उच्च न्यायालयांत म्हत्वाची सुनावणी जाली. हे विशीं ऍड. जनरल देवीदास पांगम हांणी सरकारा खातीर बाजू मांडटना स्पश्ट केलें, २१ एप्रील २०२६ दिसा जावपी जात्रे खातीर भक्तांच्या सुरक्षे विशीं कसलीच तडजोड जावची ना. आपत्ती वेवस्थापन आनी गर्दी नियंत्रणा खातीर सरकारान एक व्यापक ‘ऍक्शन प्लॅन’ तयार केला, जाचो तपशील न्यायालयाक दिला.
उत्तर गोंय जिल्हो दंडाधिकार्यान न्यायालयांत सादर केल्ल्या प्रतिज्ञापत्रा प्रमाण पुराय देवळाच्या वाठारांत आनी म्हत्वाच्या रस्त्यांचेर सीसीटीव्ही कॅमेरे बसयतले. ‘संयुक्त कमांड सेंटर’ सगळ्या हालचालींचेर बारीक नदर दवरतलें. एकूणच फाटल्या वर्सा घडिल्ली दुखेस्त घडणूक परतून जावची न्हय हे खातीर प्रशासनान तयारी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
