शितीदान पावलां उखलात……

भांगरभूंय | प्रतिनिधी

एका काळार ‘चंबल की घांटी’ गाजताली. मध्य प्रदेशांत ग्वाल्हेर आनी मुरैना शारां मदीं हो वाठार आसा. हांगा एकसे बढकर एक म्हणटात, तसले डाकू आशिल्ले. हिंदी सिनेमांनी तांचें भिरांकूळ चित्रण जालां. तशे दरेका राज्यांत गुन्यांवकारीचे अड्डे आशिल्ले वा अजून आसात, थंय गुंडगिरी आनी हेर सगले धंदे चलतात. गोंयांत पसून असले गांव आशिल्ले. कालांतरान लोक शिकले, नोकरी, धंदे करपाक लागले, सरपंच, आमदार जाले. बऱ्या मार्गाक लागले. मात, हालींच्या कांय वर्सांनी गोंयच्या दर्यादेगांचेर गुंडगिरी एकवटिल्ली जाणवता. दर्यादेगांचेर हेर बरेंच कितें चलता. हांगा जाल्ले खून, दुबावीत मरणां गाजल्यांत. पयर हणजुण्यां पर्यटकांचेर हल्लो जालो. ताचो निशेध करता तितलो उणोच. पर्यटन हें सध्या भांगराचें तांती दिवपी कोंबी जालां, हाचो आमकां विसर पडपाक लागला. हणजूण सारके प्रकार कालांतरान चालूच उरले जाल्यार ही कोंबी मरणाचे धडेर पावतली आनी ताचो परिणाम अर्थवेवस्थेचेर जातलो. देखून सरकारी यंत्रणांनी आतां चड सादूर रावपाचो वेळ आयला.
हणजुण्यां दिल्लीच्या पर्यटक कुटुंबाचेर पयर हल्लो जालो. तांणी सोशल मिडियाचेर व्हिडियो घालतकच हो प्रकार सगल्याक कळ्ळो आनी पुलीस तपासाचें चक्र आनीक नेटान घुंवपाक लागलें. कुटुंबाच्या मतान, हाॅटेलांत एका कर्मचाऱ्यान तांचे कडेन गैरवर्तन केलें. ताची कागाळ वेवस्थापका कडेन करतकच ताणें ताका कामा वयलो काडलो. सांजवेळार तो आपल्या कांय वांगड्यांक घेवन हाॅटेलाचे गेटीचेर आयलो आनी तांणी पर्यटक कुटुंबांतल्या एकल्या कडेन वाद घालपाक सुरवात केली. उपरांत बाकीचे पर्यटक थंय वतकच तोंडाक तोंड लागलें आनी मारामारी सुरू जाली. तातूंत दुबावितांनी सुरयेचो वापर करून पर्यटकांक जखमी केले, असो आरोप आसा. त्या व्हिडियोंत मेजपाक येवचे नात इतले टांके घाल्ली एक व्यक्ती दिसता. एकूणच हो प्रकार आंगार कांटो हाडपी आसा. सरकारान हें प्रकरण गंभीरपणान घेवन चवकशेचे आदेश दिल्यात. मारपेटाचें स्वरुप पळयल्यार खुनाचो यत्ना खातीर आशिल्ल्या कलमा खाला गुन्यांव नोंद जाला, पूण उसरां. आतां तो नोंद करपाक उशीर केल्ल्या संबंदीत पुलिसाचेर कारवाय जातली. दुसरे वटेन हाॅटेलाच्या वेवस्थापकान पर्यटक आनी कर्मचारी हांचे मदीं व्हडलें केस्तांव जाल्लें जाल्यार बेगोबेग पुलीस कागाळ करपाक जाय आसली. सांजवेळा मारामारी जावन रक्तां व्हांवले उपरांत ताणें कागाळ केल्या आसतली. सोशल मिडियाचेर व्हिडियो व्हायरल जालो तेन्ना चूक कोणाची हे विशीं लोकांनी प्रस्न विचारल्यात. पुलीस तपासांत सत्य कितें तें भायर सरतलेंच. हाॅटेलाच्या सीसीटीव्ही फुटेजींत सगलें आसा. ताचे वयल्यानूच पुलिसांनी दोग- तीग जाणांक अटक केल्या. चूक कोणायचीय आसूं, पूण सुरयो, तरसादी घेवन हल्लो करप कायद्यांत बसना. आपले विचार, कृती आवडना हाचो अर्थ ताचेर हल्लो करप योग्य न्हय. ते खातीर कायदो आसा, हाची जाणीव गरम तकलेच्या तरणाट्यांनी दवरपाक जाय.
दुसऱ्या राज्यांत, देशांत वचपी पर्यटकांचीय जापसालदारकी आसता. थंयचे कायदे, शिश्टाचार तांणी पाळूंक जाय. स्वताच्या घरांत आशिल्ले भशेन दादागिरी करूंक जायना. दुसऱ्यांक तुच्छ लेखपाक जायना. गोंयांत बऱ्याच प्रमाणांत पश्चिमी संस्कृताय, मेकळें वातावरण आसा… तें पळोवन कांय पर्यटक भुल्लुसतात आनी स्वैर वागपाक लागतात. दिगंबरावस्थेंत हेडप, उक्ताडार सोरो पियेवप, नशेंत झगडीं, मोटारसायकलीचेर कसरती करप, दर्यांत मोटारी घालप….. मागीर पुलिसांनी वा आनीक कोणेय हटकिलें, वाद जालो काय ‘गोवा इज नोट सेफ’ म्हूण हालेटी मारतात. हालींच पोरण्यां गोंयां एक पर्यटक जोतें घेवन सुरक्षा रक्षकाक मारपाक वचपाची घडणूक घडली. सहलीक, टुराक वतना अहंकार, मिजास घरा कडेन दवरून वचपाचें आसता. पूण चडशे आपल्या मूळ सभावा प्रमाण वागतात आनी त्रासांत पडटात. हणजुण्या नोकरी गेली म्हूण तो कर्मचारी तिडकीन इश्टांक घेवन पर्यटकांक बुद्द शिकोवपाक आयला आसतलो, पूण तांणी वापरली ती पद्दत कोणूच मान्य करचो ना. तो गुन्यांव जालो.
गोंय सध्या पर्यटकां कडल्यान मेळपी दुडवांचेर चलता, अशें म्हणल्यार ती अतिताय थारची ना. अतिथी देवो भवः अशें पर्यटन मळाचें ब्रिदवाक्य आसा. तेन्ना दर्यादेगांचेर कितेंय करतना शितीदान पावलां घालपाक जाय. दोगांयनी. पर्यटन खात्या कडेन आतां स हजारां वयर ल्हान हाॅटेल, शॅक्सांची नोंद जाल्या, अशें मुख्यमंत्री सावंत हांणी काल सांगलें. पर्यटन मळ जाग्यार पडटा, आतां थंयचे चुकीचे प्रकार चलतात, तेय बंद जावचे. सरकारी यंत्रणा प्रामाणीक आनी सादूर रावत जाल्यार हें शक्य आसा.