भांगरभूंय | प्रतिनिधी
भाजपाचे म्हणयारे सिध्देश नायक हांची टिका
पणजीः भाजपाचे उलोवचे परस गिरीश चोडणकार हे कॉंग्रेसीचे प्रदेशाध्यक्ष आसतना तांचे आमदार कित्याक फुटले आनी पदाधिकारी राजिनामो दिवन कित्याक पक्षातल्यान पयस जाले हाचें रजांव दिवचें. पक्ष घटमूट करचे सोडून चोडणकार हे पक्ष काबार करपाक उठल्यात. भाजप २०२७ वेचणुकेंत ३० परस चड मतदारसंघ जिखून सत्तेंत येतले, अशें भाजपाचे म्हणयारे सिध्देश नायक हांणी सांगलें.
भाजप साश्ट म्हालांत सेक्युलर पक्षांक देवून कॉंग्रेसीची मतां फोडपाचो यत्न करपाक सोदता. हें कॉंग्रेसीचे गोंय प्रदेशाध्यक्ष गिरीश चोडणकार हांणी केल्ल्या आरोपाक नायक हांणी पत्रकार परिशदेंत जाप दिल्या. ह्या वेळार रविंद्र भवन मडगांवचे अध्यक्ष जयंत जाधव हजर आशिल्ले.
आपली राजकी अस्तीव राखून दवरपा खातीर गिरीश हांणी भाजपान एका सेक्युलर पक्षाक साश्टींत १०० कोटी दिल्यात असो आरोप केला, अशी टिका नायक हांणी केली.
वर्स २०१८ ते २०२२ चोडणकार हे अध्यक्ष आशिल्ले तेन्ना आनी आतां लेगीत चोडणकार हे अध्यक्ष जाले उपरांत खुबशे कार्यकर्ते आनी आदले अध्यक्ष हे कुशीक उरल्यात. तांच्या कितल्याशाच पदाधिकार्यांनी राजिनामो दिला. अध्यक्षाचें काम पक्ष घटमूट करप आसता, मात हांगा परतें जालां. हांगा अध्यक्ष जातकत पदाधिकारी राजीनामो दिवन कुशीक सरतात, असो आरोप नायक हांणी केलो.
वर्स २०१८ ते २०२२ गिरीश चोडणकार हे अध्यक्ष आसतना कितल्या आमदारांनी पक्षफुटी केली आनी कित्याक जाली हाचे तांणी उत्तर दिवचें. जेन्ना चोडणकार हे अध्यक्ष जाता तेन्ना कॉंग्रेस पक्ष हो दुबळो जाता. आयज सगळे विरोधक युती करपा खातीर भोंवता मात एकय पक्ष कॉंग्रेसी बरोबर येवपाक तयार ना. गिरीश चोडणकार हांच्या फुडारपणा खाला कॉंग्रेस पक्षाचें अस्तिव काबार जावन तें फकत प्रादेशिक पक्षा मेरेन मर्यादीत रावतले अशी आमकां अपेक्षा आसा, असो थोमणो नायक हांणी मारलो.
भाजप हो देशांतल्या १४ कोटी कार्यकर्त्यांचो आनी गोंयांत ४ लाख कार्यकर्त्यांचो पक्ष आसा. अशें विधान करप म्हळ्यार ४ लाख लोकांचो अपमान करप. आमकां १०० कोटी मोडपाची गरज ना. दरेक मतदारसंघांत आमचे कार्यकर्ते सक्षम आसात. २०२७त उण्यात उणे ३० मतदारसंघ जिखतले अशें भाजप अध्यक्ष दामू नायक आनी मुख्यमंत्री प्रमोद सावंत हांणी सांगलां. मात भाजप ३० परस चड सुवातींचेर भोवमतान जिकून भाजपाचो सरकार घडयतलें, असो विश्वास नायक हांणी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
