ज्येश्ठ दिग्दर्शिका विजया मेहता संवसाराक अंतरली

भांगरभूंय | प्रतिनिधी

मुंबय : मराठी रंगमाची आनी समांतर सिनेसृश्टीक मोलाचें योगदान दिल्ली ज्येश्ठ दिग्दर्शिका आनी अभिनेत्री विजया मेहता (92) काल मुंबय संवसाराक अंतरली. कलेच्या मळार तांणी व्हडलें काम केलां.
विजया मेहता हांकां नाट्यमळाचेर ‘बाई’ ह्या नांवान वळखताले. 1960 च्या दशकांत तांणी विजय तेंडुलकर, अरविंद देशपांडे आनी डाॅ. श्रीराम लागू हांच्या वांगडा मेळून ‘रंगायन’ ही प्रायोगिक नाट्यसंस्था स्थापन केली. हे संस्थेन मराठी रंगमाचयेक नवी दिशा दिली.
तांच्या मरणाचेर प्रधानमंत्री नरेंद्र मोदी, अनुपम खेर, नाना पाटेकर, मुख्यमंत्री देवेंद्र फडणवीस आनी हेरांनी दुख्ख उक्तायलां.

नाटकां, सिनेमाक योगदान
‘अजब न्याय वर्तुळाचा’, ‘एक शून्य बाजीराव’, ‘वाडा चिरेबंदी’, ‘हयवदन’, ‘बॅरिस्टर’, ‘हमिदाबाईची कोठी’ अशीं जायतीं गाजिल्लीं नाटकां मेहता हांणी दिग्दर्शित केलीं. तांणी ‘रावसाहेब’ (1986) आनी ‘पेस्टनजी’ (1988) सारक्या चित्रपटांचे दिग्दर्शन केलें. अभिनेत्री म्हणून ‘पार्टी’ (1984) चित्रपटातली तांची भूमिका खूब गाजली, तांकां ते खातीर सहाय्यक अभिनेत्रीचो राष्ट्रीय पुरस्कारुय मेळ्ळो. तांची ‘लाईफलाईन’ ही वैजकी टिव्ही माळ पसून 1980 च्या दशकांत लोकप्रीय जाल्ली.
नाना पाटेकर, विक्रम गोखले हांचे सारक्या व्हडल्या कलाकारांच्या अभिनय प्रवासाक आकार दिवपाचें काम विजयाबाईन केलां.

जल्म, वैयक्तीक जीण
विजया मेहता हांचो जल्म 1934 वर्सा बडोदा हांगा जाल्लो. तांचे आदलें नांव विजया जयवंत. तांणी इब्राहिम अल्काझी आनी आदि मारझबान हांच्या मार्गदर्शना खाला अभिनयाचें आनी दिग्दर्शनाचें धडे चिरले. अभिनेत्री नलिनी जयवंत ही तांची चुलत भयण, नूतन, तनुजा हांची आई अभिनेत्री शोभना समर्थ ही नलिनीची मावसभयण. अभिनेते विजू खोटे आनी शुभा खोटे ही विजया मेहता हांच्या देराचीं भुरगीं.
विजया मेहता हांचें पयलें लग्न हरीन खोटे हांचे कडेन जाल्लें. रवी आनी देवेन हे तांचे चले. हरिन खोटे तरणाटे पिरायेचेर अपघातांत वतकच मांय दुर्गा खोटे हांच्या सांगण्या वयल्यान तांणी फर्रोख मेहता हांचे कडेन लग्न केलें. अभिनेत्री अनाहिता आॅबेराॅय ही तांची चली.
विजया मेहता हांकां 1975 वर्सा ‘संगीत नाटक अकादमी’ पुरस्कार, तर 1986 त तांकां पद्मश्री मेळ्ळ्या. 2009 त तांकां तन्वीर सन्मान मेळिल्लो.