भांगरभूंय | प्रतिनिधी
आयज १ जुलय सावन वेपारी सिलिंडरांचें दर सरासरी १८० रुपया उणें केलां. आतां हे सिलिंडर दिल्लींत २,९३० रुपयांक मेळटले. हाचे वांगडाच पेट्रोल पंपाचेर दर दिसा दर वाहनांत फक्त २०० लिटर डिझेल भरपाची मर्यादाय फाटीं घेतल्या.
ते भायर पासपोर्ट मेळोवप वा परतून जारी करप आतां पयलीं परस चड खर्चीक जालां. कारण सामान्य पासपोर्टाचे शुल्क १५०० रुपया वयल्यान २५०० रुपया मेरेन वाडयल्यात.
जुलयांत जातले ६ व्हडले बदल
१. वेपारी गॅस सिलिंडर सरासरी १८० रुपया सवाय
बदलः तेल कंपनींनी वेपारी गॅस सिलिंडराचें दर सरासरी १८० रुपया उणें केलां. दिल्लींत ताचें मोल रु. २,९३० जालां. पयलीं रु. ३,११३.५० इतल्या मोलान मेळटाले.
परिणामः वेपारी सिलिंडरांचें दर उणें जाल्ल्यान रेस्टॉरंट धनयांचो खर्च उणो जातलो. हाका लागून तांकां च्या, नाश्तो आनी थाली सवाय दरांत दिवंक मेळटली. लग्नांत कॅटरींगूय सवाय जावंक शकता.
देशांतल्या मुखेल शारांनी कमर्शियल गॅस सिलिंडराचें मोल
शार – नवी किंमत – आदली किंमत – फरक
दिल्ली – २९३०.०० – ३११३.५० – १८३.५०
कोलकाता – ३०८१.५० – ३२५५.५० – १७४.००
मुंबय – २८८५.५० – ३०६७.५० – १८२.००
चेन्नय – ३१०६.०० – ३२८३.०० – १७७.००
१४ किलो घरगुती सिलिंडराच्या दरांत बदल जावंक ना.
२. नायराच्या पेट्रोल आनी डिझेलाच्या दरांत ५ आनी ३ रुपया कापले
खाजगी इंधन किरकोळ विक्रेतो आशिल्ल्या नायरा एनर्जी कंपनीन पेट्रोलाचें दर लिटराक रु ५ आनी डिझेलाचें दर रु ३ प्रती लिटर उणे केल्यात. हाका लागून भोपाळांत पेट्रोलाचें दर रु. १०७ आनी डिझेलाचें दर रु. ९२ प्रती लिटर जाल्यात. ‘नायरा’ देशभरांत ७ हजारां परस चड पेट्रोल पंप चलयता.
परिणाम: हाका लागून सामान्य नागरिकांक चलनवाडींतल्यान सुटका मेळटली. डिझेलाचें दर उणें जाल्ल्यान मालवाहतूक खर्च उणो जाता. ताका लागून फुडल्या दिसांनी फळां, भाजीपालो, किराणां आनी हेर गरजेच्या वस्तूंचे दर देंवूं येतात.
३. डिझेलाचे विक्रीवेली मर्यादा १ जुलय सावन काडली
बदलः आतां पेट्रोल पंपांचेर गाडयेंत दिसाक फकत २०० लिटर डिझेल भरपाची मर्यादा सोंपली. म्हणल्यार आतां तुमच्या वाहनांत जाय तितले डिझेल भरूंक मेळटले. हाचे वांगडाच कारखानो आनी वेपारी खरेदीदारांचेर आशिल्ली बंदीय काडून उडयल्या.
पेट्रोलियम मंत्रालयान ११ जून दिसा पेट्रोल आनी डिझेलाच्या उणावाक लागून हे निर्बंध लागू केल्ले, पुरवण सुदारले उपरांत २९ जून दिसा दिल्ल्या नव्या आदेशा वरवीं हे निर्बंध फाटीं घेतिल्ले. फाटल्या १८ दिसां सावन व्हड गिरायक फकत बल्क सेल पॉयंटांतल्यान इंधन विकतें घेताले.
परिणाम: ह्या निर्णयाक लागून सादारण मोटारी चालक, येरादारी करपी आनी व्हड वेवसायीक खरेदीदारांक तांच्या गरजे प्रमाण सरळ पेट्रोल पंपा वयल्यान जाय तितलें डिझेल भरपाक मेळटलें. ते भायर फाटल्या १८ दिसां सावन कारखाने आनी व्हड गिरायकांक इंधनाचो जाणवपी उणावय आतां सोंपतलो.
४. पासपोर्ट काडप जालें म्हारग
बदलः केंद्र सरकारान पासपोर्ट शुल्क वाडयलां. हें शुल्क १ जुलय सावन लागू जालां. पयलीं पासपोर्ट शुल्क २०१२ वर्सा वाडयल्लें, म्हणल्यार ही वाड १४ वर्सां उपरांत आयल्या.
परिणाम: आतां नवो पासपोर्ट मेळोवपी वा पोरणो पासपोर्ट नुतनीकरण करपी नागरिकांच्या बोल्सार सरळ परिणाम जातलो आनी तांकां रु. १,००० ते रु. २,००० मेरेन चड खर्च करचो पडटलो.
५. गाडयेंतल्यान तिकेट नासतना प्रवास केल्यार दुपेटीन दंड भरचो पडटलो
बदल: रेल्वे मंत्रालयान रेल्वेंतल्यान तिकीट नासतना प्रवास करपाचो उणो दंड रु. २५० वयल्यान रु. ५०० मेरेन वाडयला. आतां धरल्यार प्रवाशांक मूळ तिकेट भाड्या वांगडा उण्यांत उणें रु. ५०० शुल्क भरचें पडटलें. ते भायर ही केस दंडाधिकार्याच्या न्यायालयांत गेल्यार आनी गुन्यांवकारी थारल्यार चडांत चड ख्यास्त ६ म्हयने बंदखण, रु. १,००० दंड वा दोनूय अशी आसतली.
परिणामः तिकेट नासतना प्रवास करपी प्रवाशांक आतां दुप्पट खर्च येतलो. देखीक, तपासणी केंद्रा मेरेन मूळ भाडें रु. १५० आसल्यार पयलीं (पोरण्या नेमा प्रमाण): भाडे रु१५० + दंड रु. २५० = वट्ट रु. ४०० भरचे पडटाले.
आतां नव्या नेमां प्रमाण : भाडें रु. १५० + दंड रु.५०० = वट्ट रु. ६५० भरचे पडटले.
६. आधार कार्डांत फुकट अपडेट
बदल: UIDAI न १ जुलय सावन आधार कार्डाचेर ईमेल पत्तो अपडेट करपा खातीर रु. ७५ शुल्क माफ केलां. ही सेवा फुडले स म्हयने म्हळ्यार ३१ डिसेंबर २०२६ मेरेन फुकट उरतली. ह्या काळा उपरांतच परतून शुल्क घेतले.
परिणाम: ह्या निर्णयाक लागून जांकां तांच्या आधारांत ईमेल आयडी लिंक वा अपडेट करपाचो आसा, अशा कोट्यांनी नागरिकांक थाकाय मेळटली. आतां तांकां आपलो ईमेल पत्तो ऑनलायन वा नियुक्त केंद्रां वरवीं कसलोच अतिरिक्त शुल्क घेनासतना फुकट अपडेट करपाक मेळटलो.
७. आयच्यान गाडी घेवप जातलें म्हारग
बदल: चडशा ऑटोमोबायल कंपनींनी १ जुलय सावन आपल्या वाहनांचे दर वाडोवपाचें थारायलां. ते प्रमाण किआ इंडियान आपल्या सगळ्या वाहनांचो दर २ टक्क्यां मेरेन वाडयला, जाल्यार टाटा मोटर्स कंपनीन १.५ टक्क्यां मेरेन दर वाडयतलें.
परिणाम: १ जुलय सावन नवी गाडयो घेवपी गिरायकांच्या बोल्साचेर भार येतलो आनी तांकां पयलीं परस चड पयशे फारीक करचे पडटले. टाटा मोटर्स गाडयो पसंत करपी गिरायकां खातीर आतां परंपरीक इंधन गाडयां वांगडाच इलेक्ट्रीक गाडयोय घेवप म्हारग पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
