भांगरभूंय | प्रतिनिधी
फोंडें: शिगांव-कुळ्यां मिरीयम फार्मा कडेन रस्त्याचे कुशीक आशिल्ल्या विजेच्या खांब्याक पल्सर दुचाकीचो धपको बसून अनीश कुजूर (21, कुळें) ह्या तरणाट्याक जाग्यारूच मरण आयलें. कुळें पुलिसांनी अपघाताचो पंचनामो केला.
कुळें पुलिसांनी दिल्ले म्हायती प्रमाण अनीश कुजूर हो तरणाटो शिगांव सावन कुळ्यां वतालो. दुचाकी वयलो ताबो गेल्ल्यान मिरीयम फार्म हांगा रस्त्याचे कुशीक आशिल्ल्या विजेच्या खांब्याक दुचाकीचो नेटाचो धपको बसलो. वीज खांब्याक अनीश कुजूर हाची तकली नेटान आपटल्ल्यान ताका जाग्यारूच मरण आयलें.
अनीश कुजूर हाची कूड मरणा उपरांतचे तपासणे खातीर मडगांवां सरकारी हॉस्पिटलांत धाडून दिल्या. कुळें पुलीस निरिक्षक सगूण सावंत हांच्या मार्गदर्शना खाला उपनिरिक्षक सदानंद देसाय हांणी अपघाताचो पंचनामो केलो.
मंगळारा सांजवेळा 6 वरांच्या सुमाराक अपघात घडून अनीश कुजूर हाका मरण आयिल्ल्यान वाठारांत दुख्खाची सया पातळ्ळ्या. एक बरो फुटबॉल खेळगडो म्हूण अनीश कुजूराक वाठारांत वळखताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
