भांगरभूंय | प्रतिनिधी
विजय सरदेसायः पक्षा वतीन वेंचणूक आयोगाक पत्र
भांगरभूंय । प्रतिनिधी
मडगांवः शिगम्या निमतान विवीध वाठारांनी चित्ररथांची मिरवणूक काडटात. कांय कडेन शिगम्याची मिरवणूक रातच्या 10 वरांचेर बंद केल्या. ह्या चित्ररथां खातीर खूबश्या तरणाट्यांची मेहनत आसता. संस्कृतीचें दर्शन घडोवपाचो तांचो यत्न आसता. ते खातीर शिगम्याचे मिरवमुकेक वेळाचें बंधन घालचें न्हय, अशी मागणी राज्य वेंचणूक आयोगा कडेन पत्रा वरवीं केल्ल्याची म्हायती आमदार विजय सरदेसाय हांणी दिली. मडगांवां प्रसार माध्यमां कडेन ते उलयताले.
गोंय सरकार संस्कृतीच्यो गजाली सांगतात. शिगम्याच्यो मिरवणुको आवाजाचें कारण दिवन रातच्या 10 वरांचें बंधन घालून बंद करतात. गोवा फॉरवर्ज पक्षा वतीन गोंय वेंचणूक आयोगाक पत्र धाडून शिगम्या खातीर 10 वरांची मर्यादा रद्द करपाची मागणी केल्या. हिंदू संस्कृतीचे झेत मारपी सरकारा कडल्यान हें अपेक्षीत ना. हे आदीं रामनमी दिसा सुटू जाहीर करपाची मागणी लेगीत आपणे केल्ली, तेंवूय सरकार विसरिल्लें. राजकी शिगमो कितलोय करात, पूम लोकांची संस्कृती दाखोवपी शिगम्याक वेळाचें बंधन आसचें न्हय, अशी मागणी वेंचणूक आयोगा कडेन केल्या, अशें सरदेसाय हांणी सांगलें. ईडीचे धाडी विशीं उलयतना सरदेसाय हांणी सांगलें, ईडीच्यो धाडी हो राजकी खेळाचो भाग, तो जातलोच. विरोधी पक्षांचेर चेपण हाडपाचो यत्न जातलो. ईडीन धाड घातली, समन्स जारी केले म्हूण भियेवपाची गरज ना. अमीत पालेकार हांणी सांगिल्ले प्रमाण ईडीच्या प्रस्नाक जापो दिवप ही योग्य भुमिका आसा. कांयच करूंक ना जाल्यार भियेवपाची गरज ना, प्रस्नाच्यो जापो दिवच्यो, अशेंय सरदेसाय हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
