भांगरभूंय | प्रतिनिधी
सगूण वेळीप: काणकोणां शिगमोत्सव मनयलो दबाज्यान
काणकोण: शिगमोत्सवान गोंयची संस्कृताय तिगोवन दवरल्या. शिगमोत्सवाक लागून एकवट निर्माण जाता. एकवटाचें बरें उदाहरण म्हणल्यार शिगमो अशें कला आनी संस्कृती खात्याचे संचालक सगूण वेळीप हांणी सांगलें.
ते गोंय राज्य पर्यटन खातें, काणकोण शिगमोत्सव मंडळ आनी काणकोण नगरपालिका मंडळ हांणी घडोवन हाडिल्ल्या शिगमोत्सवांत मुखेल सोयरे म्हूण उलयताले.
ह्या वेळार उत्तर गोंयचे सीईओ अजय गावडे, काणकोणचे उपजिल्होधिकारी मधू नार्वेंकार, दिवचलचे उपजिल्होधिकारी रमेश गांवकार, मुख्याधिकारी मंगलदास गांवकार, कृशी खात्याचे सहाय्यक संचालक नागेश कोमरपंत, फलोत्पादन म्हामंडळाचे वेवस्थापकी संचालक चंद्रहास देसाय, पर्यटन खात्याचे अधिकारी रोडलीन मास्करेन्हास, बेनेदिक्टो सोक्राफेमिलिया, मेघना गावडे, शिगमोत्सव समितीचे कार्याध्यक्ष बबेश बोरकार, सचीव सिद्धार्थ देसाय, भांडारी सुभाष महाले, अजय भगत आनी हेर पदाधिकारी माचयेर हाजीर आशिल्ले. ह्या वेळार अजय गावडे, चंद्रहास देसाय, रमेश गांवकार हांचीं भाशणां जालीं.
चार रस्तो हांगा कला आनी संस्कृती खात्याचे संचालक सगूण वेळीप हांणी बावटो दाखोवन आनी मळबांत बोमाडें सोडून शिगमोत्सवाचें उक्तावण केलें. काणकोण म्हालांत अंदूं बायलांनी फुडाकार घेवन तयार केल्ल्या जिजाऊ महिलांच्या रोमटामेळ पंगडाचे मिरवणुकेंत धोल पंगडाच्या सांगातान हे मिरवणुकेक सुरवात जाली. ह्या महिला रोमटामेळ पंगडांत 162 बायलांनी वांटो घेतिल्लो.
काणकोणच्यो आदल्यो नगराध्यक्षा प्रार्थना रमाकांत नायक गांवकार हांणी ह्या जिजाऊ महिला रोमटामेळाचें फुडारपण केलें. तेच बरोबर लोलयेंच्या विंदा सतरकार हांच्या फुडारपणा खाला बायलांचो दिंडी पंगड, म्हालवाड्या वेल्या बायलांचो रोमटामेळ पंगड शिगमोत्सवांत वांटेकार जाल्लो. जिजाऊ रोमटामेळ पंगडाक बबेश बोरकार, धीरज काणकोणकार, दिलीप केंकरे, अजय भगत आनी श्री. पागी हांणी अर्थीक देणगी भेट दिली.
ह्या वेळार मानेस्तांचे हस्तुकीं लोकलाकार रघुवीर कोमरपंत हांकां ख्रि. माथानी साल्ढाणा आनी रुपेश पैंगीणकार हांकां सर्गेस्त संजय बांदेकार स्मृती पुरस्कार भेटयलो.
अंदूं पयलेच फावटी समारोपाची कार्यावळ गायतोंडें मैदानार करिनासतना कदंब बस स्टॅण्णडा मुखार दवरिल्ली. शिगमोत्सव मिरवणुकेचे उक्तावण केले उपरांत आयोजकांचे वतीन उपजिल्होधिकारी मधू नार्वेंकार आनी हेर मानेस्तांनी कदंब बस स्टॅण्डा मुखार आशिल्ल्या छत्रपती शिवाजी महाराजांच्या अर्दपुतळ्याक फुलांहार घालो. मानेस्तांक नम्रता देसाय आनी स्मिता शिंगाळे हांणी फुलांतुरे भेटयले. मानेस्तांक बबेश बोरकार, सुभाष महाले, सिद्धार्थ देसाय हांणी यादस्तीक भेटयलें.
सुत्रसंचालन शिरीश पै हांणी केलें, जाल्यार सिद्धार्थ देसाय हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
