शिक्षिकेची बदली रद्द करात नाजाल्यार भुरग्यांक शाळेंत धाडचे नात, पालकांची शिटकावणी

भांगरभूंय | प्रतिनिधी

फोंडें, प्रतिनिधी ः जुना बाजार फोंडेंच्या सरकारी मुळाव्या शाळेच्या शिक्षिकेची बदली रोखडीच रद्द करना जाल्यार भुरग्यांक शाळेंत धाडचे नात अशी शिटकावणी पालकांनी शुक्रारा दिल्या. शाळेंत शिकपी 140 विद्यार्थ्यांच्या पालकांनी शुक्रारा सकाळीं भाग शिक्षण अधिकारी कार्यालयांत हें विशीं निवेदन दिलां.
सरकारी शाळेची शिक्षिका नीता पेडणेकार हिची कांय दिसां आदीं दुसरे शाळेंत बदली केली. हाका लागून पालकांनी आपली नाराजगी उक्तायल्या. शुक्रारा सुमार 60-70 पालकांनी भाग शिक्षण अधिकारी कार्यालयांत घुरी घाली. त्या वेळार भाग शिक्षण अधिकारी हाजीर नाशिल्ल्यान पालकांनी निवेदन दुसऱ्या कर्मचाऱ्यांकडेन दिलें.
शाळेंत वट्ट 140 विद्यार्थी शिकतात आनी फाटल्या कांय वर्सां सावन शिक्षिका नीता पेडणेकार उत्कृश्ट काम करुन बरें तरेन भुगऱ्यांक शिकयता. पूण शिक्षण खात्यान शिक्षिकेची दुसरे शाळेंत बदली केल्ल्यान पालक आपली नाराजगी उक्तायतात. शिक्षकाची बदली रद्द केली ना जाल्यार विद्यार्थ्यांक शाळेंत धाडचे नात अशी शिटकावणी दिल्या.