भांगरभूंय | प्रतिनिधी
मंत्री श्रीपाद नायकः खासदारकीक लागून गोंयकारांच्या उपकारांत
भांगरभूंय । प्रतिनिधी
पेडणें: दरेका विद्यार्थ्यान शिक्षणा वांगडाच आपले भलायकेची जतनाय घेवप गरजेची आसा, अशें केंद्रीय मंत्री श्रीपाद नायक हांणी सांगलें.
विर्नोडेंच्या संत सोयरोबानाथ आंबिये सरकारी उच्च म्हाविद्यालयाच्या सभाघरांत पेडणें म्हालांतल्या वट्ट 28 हायस्कुलां खातीर सॅनेटरी यंत्रणा उपलब्ध आनी वितरीत करपाचे कार्यावळींत मंत्री नायक उलयताले. ह्या वेळार माचयेर पेडणेंचे आमदार प्रवीण आर्लेकार, म्हाविद्यालयाची प्राचार्य डॉ. प्रविणी केरकार, धारगळ जिल्हो पंचायत वांगडी मनोहर धारगळकार, तोरशे जिल्हो पंचायत वांगडी सीमा खडपे, विर्नोडेंची सरपंच सुजाता ठाकूर, प्रा. नीता तोरणे, महानंद अस्नोडकार हाजीर आशिल्ले.
देशाचे उदरगती खातीर प्रधानमंत्री नरेंद्र मोदी हांणी केल्लो वावर उल्लेख करपा सारको आसा. देशाक आनी गोंयाक भाजपा बगर पर्याय ना, हें लोकांनी दाखोवन दिलां. येता ते लोकसभा वेंचणुकेंत लेगीत केंद्रांत भाजपाचें पूर्ण भोवमताचें सरकार लोकांक जाय. खासदारकी दिवन आपल्याक गोंयकारांनी उपकारांत दवरला, ते उपकार आपल्याक फारीक करपाक जावचें ना. पूण केंद्र सरकाराच्या माध्यमांतल्यान प्रकल्प हाडचे खातीर आनी मागणे प्रमाण प्रकल्प उबारपा खातीर वावुरतलों. दरेका मळार सगळ्यांनीच भरीव योगदान दिवपाची गरज आसा, अशें मंत्री नायक हांणी सांगलें.
आमदार आर्लेकार हांणी सांगलें, बायलांनी आपले भलायकेची जतनाय घेवची. तेचवरी विद्यार्थिनींनी लेगीत म्हाविद्यालयांत, हायस्कुलांत, शाळांनी वतना जतनाय घेवची. ही जतनाय घेवचे खातीर केंद्र सरकार आनी खासदार श्रीपाद नायक हे विद्यार्थ्यीनीं खातीर तशेंच बायलां खातीर वेगवेगळे उपक्रम चालीक लायता. आयज हे सुवातेर पेडणें म्हालांतल्या सगळ्या शाळांक सॅनिटरी यंत्रणा उपलब्ध करून दिल्या. ताचो लाव घेवचो, अशें आर्लेकार हांणी सांगलें. प्रा. केरकार हांणी येवकार दिलो तशेंच विद्यार्थ्यांक मार्गदर्शन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
