भांगरभूंय | प्रतिनिधी
पणजी, खबरां मेज : कोंकणी भाशा मंडळान पर्वरेच्या राज्य शिक्षणीक संशोधन आनी प्रशिक्षण मंडळाच्या (एस.सी.ई.आर.टी.) जोड पालवान प्राथमीक शाळांच्या शिक्षकां खातीर कार्यशाळा आयोजीत केल्या. ही कार्यशाळा २ ऑगस्टाक (शुक्रार) सकाळीं ९ ते दनपरां १.३० मेरेन चलतली.
उत्तर गोंयच्या शिक्षकां खातीर पर्वरेच्या एस.सी.ई.आर.टी. सभाघरांत आनी दक्षीण गोंयच्या शिक्षकां खातीर मडगांवच्या रवींद्र भवनांत ही कार्यशाळा जातली.
कोंकणी भाशा मंडळाच्या शणै गोंयबाब कथामाळ सर्ती आनी काणी लेखनाची सर्त हाचे फाटभुंयेर ही राज्य पांवड्यार कार्यशाळा आयोजीत केल्या.
बाल साहित्य वा काणयेचें भुरग्यांचे उदरगतींत म्हत्व हाचे विशीं जागृताय घडोवन हाडूंक ही कार्यशाळा आयोजीत केल्या. सरकारी तशेंच सरकारी अनुदानीत प्राथमीक शाळांच्या शिक्षकांक हे कार्यशाळेंत वांटो घेवंक मेळटलो. ही कार्यशाळा ‘ऑन ड्युटी’ आसतली.
चड म्हायती खातीर, कार्यशाळेचें संयोजक शलाका देसाय हांकां ९०४९७५०८६९ ह्या क्रमांकाचेर वा सह- संयोजक यतीन नायक हांकां ९८२३९३८१२१ ह्या क्रमांकाचेर संपर्क करचो,
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
