भांगरभूंय | प्रतिनिधी
पणजी ः शिक्षण खात्या कडेन अनुदानीत शाळेतले शिक्षक वा वेवस्थापना संबंदी जायत्यो कागाळी आयल्यात. हे बाबतींत खर कारवाय सुरू केल्या. ह्यान फुडें खाजगी वा अनुदानीत शाळांनी असलें सोंसून घेवचे नात अशी शिटकावणी मुख्यमंत्री डॉ. प्रमोद सावंत हांणी दिल्या. बिरेस्तारा शिक्षण खात्यान शिक्षक दिसा निमतान आयोजीत केल्ल्या कार्यावळींत ते उलयताले. ह्या वेळार प्रसाद लोलयेकार, शैलेश झिंगडे, मेघना शेटगांवकार, डॉ. शंभू घाडी आनी हेर अधिकारी हाजीर आशिल्ले. ह्या वेळार सात शिक्षकांक मुख्यमंत्री वशिश्ट गुरू पुरस्कार दिवन भोवमान केलो.
विद्यार्थ्यांक मारपेट जावपाचो प्रकार खंत करपा सारको आसा अशें मुख्यमंत्र्यान सांगलें. खरें म्हणल्यार अशें प्रकार घडूंक फावना. खरी शिक्षक आशिल्लो मनशाक हें करपाक शकना. कांय शाळांक तांचे आनी सरकाराचें कसलेच संबंद ना अशें दिसता. पूण तांकां सरकारा कडल्यान अनुदान मेळटा हें लक्षांत दवरपाची गरज आसा. केन्ना केन्नाय संस्थेच्या वेवस्थापनाक लागून शिक्षकांच्या पगाराक कळाव जाता. कांय शिक्षक वेवस्थापनाकडेन दादागिरी करतात. अशा प्रकारांक लागून विद्यार्थ्यांचेर परिणाम जाता जाल्यार शाळांचेर कारवाय जातली.
सध्या शिक्षणीक मळार तंत्रगिन्यानाचो वापर वाडला अशें तांणी सांगलें. हें आपणावपा खातीर शिक्षण खात्यान राज्यांतल्या शाळांक शक्य तितली मजत केल्या. पूण स्मार्ट क्लासरूम परस स्मार्ट शिक्षक आसप चड म्हत्वाचें आसा. शिक्षकांनी विद्यार्थ्यांक फकत पुस्तकीच न्हय तर वेव्हारीक ज्ञानूय दिवचें. भावनीक नदरेन विद्यार्थी सक्षम जावचे खातीर शिक्षकांनी यत्न करचे. विद्यार्थ्यांची प्रवृत्ती पळोवन तांकां योग्य करिअर मार्गदर्शन करपाक जाय.
बंद पडिल्ल्या शाळेन घडयली पिळगी
प्रसाद लोलयेकर हांणी सांगलें, सरकारी मुळाव्यो शाळा बंद जावपाक वेगवेगळीं कारणां आसात. म्हज्या वाड्या लागसार आशिल्ली एक मुळावी शाळा बंद पडिल्ली. त्या शाळेंत विद्यार्थी शिकून गेले. थंय आतां कोणूच नाशिल्ल्यान विद्यार्थ्यांचो आंकडो उणो जावन शाळा बंद जाली. पूण हांव म्हजी शाळा बंद पडली म्हणचे परस म्हज्या शाळेन तयार केल्ली एक पिळगी आतां संवसारभर काम करता अशें म्हणटलो.
शिक्षकांनी पट्टी लेगीत हातांत घेवंक फावना
शिक्षण संचालक शैलेश झिंगडे हांणी कार्यावळी उपरांत प्रसार माध्यमां कडेन संवाद सादलो. तांणी म्हणलें, खंयच्याच शिक्षकाक विद्यार्थ्यांक मारपाचो अधिकार ना. वेळोवेळ आमी विद्यार्थ्यांक ख्यास्त दिवची न्हय असो आदेश दितात. शिक्षकांनी हातांत पट्टी लेगीत घेवची न्हय अशी सुचोवण्यो दिल्यात. कामुल्ले घडिल्लो प्रकार धक्को दिवपी आसा. त्या शिक्षकांच्या निलंबना विशीं 12 तारखेक सुनावणी जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
