भांगरभूंय | प्रतिनिधी
कोलकाता, खबरां संस्था : अस्तंत बंगालांतल्या ‘सिलगुडी सफारी पार्कां’ तल्या शिंवांच्या नांवा विशीं वाद जाला. ‘सीता’ नांवाची मादी शींव ‘अकबर’ नांवाच्या नर शिंवाच्या वांगडा दवरपा आड विश्व हिंदू परिशदेन कोलकाता उच्च न्यायालयांत याचिका दाखल केल्या. याचिकेंत रानां खात्याचे हे कृतीन हिंदूंच्या धर्मीक भावना दुखावल्यात असो दावो तांणी केला. दोनूय शींव त्रिपुरांतल्या सेपाहिजाला प्राणीसंग्रहालयांतले आनी तांकां ल्हान आसतनाच तीं नांवां दिल्लीं. ताका लागून तांच्या नांवांत बदल करूंक नात, अशें रानां अधिकाऱ्यांनी सांगलें. दोनूय शींव एकमेकांक वळखीचे आशिल्ल्यान तांकां सिलगुडी पार्कांत एकठांय दवरल्यात. ताकाच लागून हो वाद जाला.
ही शींवाची जोडी सिलिगुरींतल्या ‘उत्तर बंगाल रानवटी जनावर उद्यान’ (सिलगुडी सफारी पार्क) नांवाच्या प्राणीसंग्रहालयांत दवरल्या. नर शींवाचें नांव अकबर आनी मादी शींवाचें नांव सीता अशें आशिल्ल्यान विश्व हिंदू परिशदेच्या बंगाल फांट्यान हाका आक्षेप घेतला. ही याचिका 16 फेब्रुवारीक कलकत्ता उच्च न्यायालयाच्या जलपाईगुरी खंडपिठांत दाखल जाल्ली आनी 20 फेब्रुवारीक सुनावणी जातली. मादी शिंवाचें नांव सीता. संवसारभरांतल्या हिंदूं खातीर सीता ही एक पवित्र देवता. अशी कृती ही ईश्वरनिंदा आसा. हिंदूंच्या धर्मीक श्रद्धेचेर हो थेट हल्लो. ह्या मादी शिंवांचें नांव ‘श्रुती’. पूण उपरांत तातूंत मुद्दाम बदल केल्ल्याचो दावो याचिकेंत केला.
‘उत्तर बंग संवाद’ ह्या दिसाळ्यांत ही खबर ‘संगीर खोजे अस्थिर सीता’ (सीता जोडीदाराच्या सोदांत अस्वस्थ) ह्या मथळ्या खाला उजवाडाक आयली. हे खबरेंत नर शींवाचें नांव ‘अकबर’ अशें म्हणिल्ले. ही खबर अत्यंत आक्षेपार्ह आनी अश्लील रितीन आयिल्ल्यान देशभरांतल्या हिंदूंच्या भावनां दुखावल्यात, अशें याचिकेंत म्हणलां.
नांव बदलपाची विनंती
सिलिगुरी सफारी पार्कांतल्या मादी शिंवाचें ‘सीता’ हें नांव बदलचें अशें याचिकेंत म्हणलां. ह्या जनावराचें नांव बदलून ताका हिंदू धर्मा कडेन मात्तूय संबंदीत नाशिल्लें खंयचेंय सामान्य नांव दिवपा खातीर बेगोबेग पावलां उबारचीं अशें याचिकेंत म्हणलां.
रान खातें म्हणटा..
कांय दिसां आदीं त्रिपुराच्या सेपाहिजाला प्राणीसंग्रहालयांतल्यान ही शिंवांची जोडी हाडिल्ली अशी म्हायती अस्तंत बंगाल रान खात्याच्या अधिकाऱ्यांनी दिली. सिलिगुरी सफारी पार्कांत येवचे पयलीं दोनूय शिंवांचीं नांवां अकबर आनी सीता अशींच आशिल्लीं. देखून तांचें नांव बदलूंक ना अशें रानां अधिकाऱ्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
