भांगरभूंय | प्रतिनिधी
वेळसांव : गांव शारीकरण अधिसुचोवणी प्रस्तावाक विरोध करपी पयले व्यक्ती आनी वेलसांवचे आदले पंच रोकेझिन्यु डिसोझा हांणी गोंय सरकाराक हो प्रस्ताव कायमचो रद्द करपाचें आवाहन केलां. लोकांचो हुस्को सोंपोवपाक हो विशय कायमचो बंद करप गरजेचें आसा, अशें तांणी सांगलें.
वेलसांवां एका वृक्षारोपण कार्यावळी उपरांत ते पत्रकारां कडेन उलयताले. डिसोझा हाणीं हे अधिसूचनेआड केल्ल्या संघर्शाची म्हायती दिली. ही अधिसूचना 4 जूनाक जारी जाली आनी 5 जूनाक वेलसांव पंचायतींत पावली. मुरगांव तालुक्यांतल्या हेर पंचायतींक लेगीत असलीं परिपत्रकां मेळिल्लीं. पूण चडशा पंचायतींनी नागरिकांक कांयच सांगलें ना वा चर्चेची सुरवातूय केली ना, असो गंभीर आरोप तांणी केलो.
डिसोझा हाणीं सांगलें, “पंचायतींनी ग्रामस्थांक हाचे विशीं म्हायती दिली ना वा विरोधूय केलो ना. म्हाका जशें हें समजले, तसो हांवें कायदेशीर सल्ला घेवन, स्वताच्या खर्चान 24 जून दिसा आक्षेप दाखल केलो. सत्तर वर्सां पिरायेर, हें काम करपाक म्हाका धांवपळ करची पडली. पंचायती इतलो काळ शांत कित्याक रावल्यो, हें म्हाका समजना.”
म्हज्या आक्षेपाक प्रसिद्धी मेळ्ळ्या उपरांतूच हें प्रकरण 35 गांवांनी पातळ्ळें आनी विरोध वाडलो, असो दावा डिसोझा हांणी केलो. आक्षेप नोंदयले उपरांत येणावळ मंत्री अतानासियो मोन्सेरात हाणीं तत्काळ निर्णय घेवन अधिसूचोवणी फाटल्यान घेतली, देखून तांणी मंत्र्यांचे उपकार मानले. “मंत्रिमंडळाचे मंजुरीची वाट पळयनासतना तांणी घेतिल्ल्या निर्णयाची हांव तुस्त करतां. हें प्रकरण वाडपाक शकता हें कळून आयलें आनी तांणी अधिसुचोवणी फाटीं घेतली. पंचायत संचालनालयान लेगीत पंचायत सचिवांक ग्रामसभा घेवपाची गरज ना, अशें निर्देश दिल्यात,” अशें तांणी सांगलें.
2020 वर्सा लेगीत असल्याच प्रकारचो प्रस्ताव आयिल्लो आनी तो उपरांत फाटीं घेतिल्लो. 2026 वर्सा परत हे प्रकरण मुखार आयिल्ल्यान ग्रामस्थां मदीं अस्वस्थता निर्माण जाल्ली, अशें ताणी नमूद केलें.
“सरकाराक अशा प्रकारचीं पावलां उखलपाची आसल्यार, तांणी पयलीं ग्रामसभेच्या माध्यमांतल्यान लोकांची मतां जाणून घेवचीं. पंचायतींक लेगीत जबाबदारी आसा की, असलीं वा हेर कसलींय परिपत्रकां येत जाल्यार तांणी बेगोबेग नागरिकांक सांगपाक जाय. जर तांकां कायदेशीर परिणामांची खात्री नासल्यार, तांणी रोखडोच तज्ञांचो सल्ला घेवचो. पंचायतींची शांतताय, आळसाय ग्रामस्थांक फोंडांत घालपाक शकता,” अशें डिसोझा हाणीं सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
