भांगरभूंय | प्रतिनिधी
भांगरभूंय । प्रतिनिधी
म्हापशेंः उच्च न्यायालयाच्या गोंय खंडपिठान दिल्ल्या आदेशा प्रमाण सरकारी यंत्रणेन उडो- शिवोली हांगा शापोरा न्हंय देगे कडेन बांदकाम करपाक बंदी आशिल्ल्या विभागांत बांदल्लें 22 कुडींचें हॉटेल निमणे मातये भरवण केलें. न्यायालयीन आदेशाचो अवमान जावचो न्हय हे खातीर यंत्रणेक निमणे ही कारवाय करची पडली.
गोंय दर्या देग विभाग वेवस्थापन प्राधिकरणान (जीसीझेडएमए) सरकारी जमनींत बांदल्लें हें बेकायदेशीर हॉटले सील करून मोडून उडोवन जमीन पयलीं सारकी करपाचो आदेश उत्तर गोंयचे जिल्होथिकारी आनी बार्देशच्या उपजिल्होधिकाऱ्याक दिल्लो. ताचे पयली गोंय खंडपिठान उत्तर गोंयांत दर्या देगेर बांदल्ली 22 बांदकामां मोडून उडोवपाचो आदेश दिल्लो. तातूंत ह्या हॉटेलाचो आसपाव आशिल्लो. ही कारवाय केली ना जाल्यार जिल्होधिकारी आनी उपजिल्होधिकाऱ्याचे न्यायालयीन अवमानाची केस चलपाक शकताली.
सीआरझेड नेमांचें उल्लंघन करून शापोरा न्हंयचे देगेर हें हॉटेल बांदल्लें. सरकारी जमनीचेर अतिक्रमण करून तशेंच जीसीझेडएमए काडल्यान फावो ते परवाने घेनासतना हें हॉटेल बांदल्लें. ताका लागून पर्यावरण संवेदनशील वाठारांत पर्यावरणाचें लुकसाण जाता हे खातीर 2021 वर्सा ह्या हॉटेल बांदकामा आड मुंबय उच्च न्यायालयाच्या गोंय खंडपिठान याचिका सादर केल्ली. हॉटेल धनयान गोंय खंडपिठान दिल्ल्या आदेशाक सर्वोच्च न्यायालयान विशेश अनुमती याचिका सादर करून आव्हान दिल्लें. मात तांची ही याचिका सर्वोच्च न्यायालयान भायर मारून गोंय खंडपिठाचो निकाल कायम केल्लो. ताका लागून ह्या हॉटेलाचेर पिकास पडपाचें निश्चीत जाल्लें.
शिवोलेच्या आलेक्स परेराक ह्या हॉटेल बांदकामा आड कागाळ केल्ली. मात संबंदीत यंत्रणे कडल्यान कसलीची कारवाय जायना हे पळोवन तांणे मागीर गोंय खंडपिठान याचिका सादर केल्ली. शिवोली- मार्ना पंचायत सुरवेक सामको कळाक करून उपरांत हॉटेल बांदकाम बेकायदेशीरपणान केल्ल्याचो अहवाल दिल्लो. आमचे कडल्यान हॉटेल बांदपाक कसलेच परवाने घेवंक ना अशें पंचायत मंडळान स्पश्ट केल्लें. जीसीझेडएमएन बार्देशच्या उप विभागीय न्याय दंडाधिकाऱ्याक हॉटेल सील करपाचे तशेंच हॉटेल धनयाक 5 लाख रुपयांचो दंड घालपाक सांगल्लें. न्यायालयीन अवमान प्रकरणाचो मुद्दो 17 एप्रिलाक मुंबय उच्च न्यायालयाच्या गोंय खंडपिठान येवपाचो आशिल्लो. मात ताचे पयलींच हॉटेलाचेर कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
