भांगरभूंय | प्रतिनिधी
१२ लाखांचें लुकसाण
म्हापशें, प्रतिनिधी ःशापोरा जेटी सावन सुमार देड किलोमिटर अंतरार दुर्यांत एक नुस्तेंमारी बोट बुडली. हे बोटीचेर आशिल्ल्या चार जाणांक दुसऱ्या नुस्तेंमारी बोटींतल्या कामगारांनी वाटायले. हे घडणुकेंत सुमार १२ लाखांचें लुकसाण जालां.
बोटींतल्या वाटयिल्ल्या नुस्तेंमार्यां मदीं बोट धनी चुडगो गांवकार (६८, रा. चोपडें), कृष्णा गांवकार (४०), दसाराम (२२) आनी संदीप (२१) ह्या चार जाणांचो आसपाव आसा.
ही घडणूक बिरेस्तारा सकाळीं सुमार १० वरांचेर घडली. शिवोले शापोरा न्हंयेंतल्यान ही बुडिल्ली बोट अरबी समुद्रांत नुस्तेंमारी खातीर गेल्ली. परततना दर्याच्या ल्हारांक लागून ती उमथली आनी बुडली. ती बुडचे पयलीं बोटीर आशिल्ल्या चारूय जाणांनी जीव वाटावपाक दर्यांत उडी मारली.
ही घडणूक घडटना ते बोटी लागींच्यान वचपी बागा जेटीवेल्या एके नुस्तेंमारी बोटींतल्या एकल्याक दिसली. ताणें बेगोबेग आपली बोट घडणुके सुवातेर व्हरपाक लायली आनी उदकांत उडी मारिल्ल्या त्या चारूय जाणांक घेवन बागा दर्यादेगेर हाडले. तातुंतल्या चुडगो गांवकार हांका जिवाक बरें दिसनाशिल्ल्यान कांदोळे मुळाव्या भलायकी केंद्रांत दाखल केला. उपरांत ताचेर उपचार करून घरा धाडलो.
हे घडणुकेची म्हायती मेळटाच शापोरा दर्यादेग पुलीस निरीक्षक गौरीश मळीक, म्हापशें उजो पालोवपी दळाचे अधिकारी गणेश गांवकार हे घडणुके सुवातेर पावले आनी पळोवणी केली.
बुडल्या ती बोट फायबरची आशिल्ली. तशेंच बोटीचेर दोन मोटर आनी जाळींय आशिल्लीं. ताका लागून सुमार १२ लाखांचें लुकसाण जाल्ल्याचें समजता. सरकारान ही लुकसाण भरपाय संबंदीत धनयाक दिवची. जाका लागून ताका आपलो वेवसाय परत सुरू करपाक मेळटालो, अशी मागणी शापोरा बोट धनी संघटणेचे अध्यक्ष बलभीम मालवणकार हांणी केली.
मजगतीं, ही बुडिल्ली बोट व्हांवून दनपरां मांद्रें-आश्वें दर्यादेगे लागसारा आयली. ही बोट दर्या देगे पसून दोन ते तीन किलोमिटर अंतराचेर आशिल्ल्यान ती थंयच्यान भायर काडपाचो यत्न शिवोल दर्यादेग पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
