भांगरभूंय | प्रतिनिधी
गोंयांत दिसपट्टे एक- दोन तरी गुन्यांव घडटाच. घुंवळे वखदां धरपाचे प्रकारूय पायलेक पन्नास. काल राजधानी पणजेंत पवन सोळंकी (33) ह्या तरणाट्याक अटक जाली. गोंय आनी राजस्थान पुलिसांची ही जोड कारवाय. दोन वर्सां पयलींय ताका गोंयांतूच धरिल्लो. पवन सोळंकी हो पंजाबांत गाजपी लाॅरेन्स बिश्णोय टोळयेचो वांगडी, अशें पुलिसांनी जाहीर केलां. हे टोळयेचे कारनामे पळयल्यार तिचे वांगडी गोंयांत सांपडप म्हणल्यार धोक्याची घांट घणघणपा सारकें जालें. सरकारी यंत्रणेक आतां केन्ना न्हय तितलें सादूर रावचें पडटलें. नाजाल्यार शांत गोंयांत अशांतीची कीट पडूं येता.
लाॅरेन्स बिश्णोय हो 30 वर्सांचो तरणाटो. पुलिसांचे म्हायती प्रमाण, ताचे आड खून, खंडणी सयत दोन डझनां वयर गुन्यांव आसात. देशांतल्या 700 शूटरां कडेन ताची टोळी जोडिल्ली आसा. सध्या तो तिहाड बंदखणींत ख्यास्त भोगता. सलमान खानाक जिवें मारपाची धमकी दिवपाचो ताचेर आरोप जाल्लो. मात ताणें एकान एक आरोप न्हयकारल्यात. पोरूं 29 मेक पंजाबी गायक सिद्धू मुसेवाला हाची हत्या जाली. तिची जापसालदारकी गोल्डी ब्रारान घेतिल्ली. आपूण हो कट बिश्णोय वांगडा आंखिल्लो, अशें ताणें उपरांत पुलिसांक सांगिल्लें. अशे भिरांकूळ टोळयेचो वांगडी जर गोंयांत (तोय दुसरे फावट) सांपडटा, तर ती भिरांतीची, हुस्क्याची गजाल म्हणची पडटली. तो कित्याक गोंयां आयिल्लो, खंय राविल्लो, कितलो तेंप राविल्लो, घरांत राविल्लो काय हाॅटेलांत….. हाचेर तपासा उपरांत उजवाड पडटलोच. गुन्यांवकार असो कोणाच्या मुखामळाचेर शिक्को नासता. ताका लागून तांकां वळखुपाक कुस्तार जाता. गोंयांत, खास करून दक्षीण गोंयांत हाचे पयलीं खांपे गुन्यांवकार येवन म्हयन्याचे म्हयने रावल्यात. तेन्ना घर भाड्याक दितना घरधनयांनी कायम सादूर रावपाक जाय.
गोंयांत घरां भाड्याक दिवपाचो नवो वेवसाय शारां लागसारच्या उपनगरांनी, गांवांनी फाटलीं कितलींशीच वर्सां चालू आसा. ह्या घरांनी हजारांनी परप्रांतीय रावतात. पूण ते कोण, खंयचे हाची खबर घरधनयांक आसताच अशें ना. कसल्याय गुन्यांवांत तांकां धरतकच तांचें वळख पत्र, आदारकार्डाची प्रत घरधनयांनी घेवंक ना, हें उक्ताडार येता. कोणाकूय भाडेकरू म्हूण दवरतना पुलिशेंत अर्ज भरपाचो आसता, ताची खबर थळाव्या लोकप्रतिनिधींनी संबंदीत घरधनयाक करून दिवपाक जाय. भाडेकरूक लागून आपूण अडचणींत आयलो जाल्यार आमचो आमदार आमकां साल्वार करतलो, अशेंच सगल्यांक दिसता. फाटीं पुलीस पंगड घराघरांनी भोवून भाडेकरूंची म्हायती घेताले, ती मोहीम नेमान चालू उरल्यार बरें. गोंय हें पर्यटन थळ आनी सध्या आमची तिजोरी ताच्याच जिवाचेर चलता, हें मतींत घेवन सरकारी यंत्रणेन आनी समाजानूय खर पावलां उबारूंक फावो. नाजाल्यार सैमसोबीत गोंय गुन्यांवकारांचें नंदनवन जावपाक उशीर लागचो ना.
इराणाक पेटला उजो
हिजाब घालूंक ना म्हूण ताब्यांत घेतिल्ले चलयेक बंदखणींत मरण येत सावन (पोरूं 16 सप्टेंबराक) इराणाचे नागरीक सरकारा आड चाळवल्यात, ते अजून शांत जावंक नात. कालचे घडणुकेंत परत एक फावट हें सामकार आयलें. 21 मार्चाक इराणाचे नवें वर्स. नवरोज. ताचे आदीं मंगळार, बुधवारा, बिरेस्तार दिसा मजगतीं चहरशांबे सुरी (होमखण) उत्सव जाता. तातूंत 26 लोकांक मरण आयलें, तर चार हजार लोक जखमी जाले. ह्या उज्या उत्सवांत बायलो आपले स्कार्फ उज्यांत उडयतात आनी लोक उज्या वयल्यान उडी मारतात. उजो पवित्र आशिल्ल्यान ताचे वयल्यान उडी मारतकच वायट गजाली लासून गोबर जातात, अशी भावना आसा. मात इराणांतल्या कडव्या लोकांक हो उत्सव इस्लामविरोधी दिसता. ताका लागून तो आडावपाक पुलिसांचो वापर दरवर्सा जाताच. अंदूं त्याच वेळार ही घडणूक घडल्या. अर्थांत हिजाब विरोधी आंदोलनाक लागून अंदू हो स्कार्फ जाळपाचो उत्सव चड नेटान जालो. विशेश म्हणल्यार नवरोज आनी चहरशांबे सुरी हे दोनूय उत्सव पारशी. (इराणांत पयलीं सगले पारशी आशिल्ले.) ह्या उत्सवा दिसाच हिजाब विरोधी निदर्शनां दवरिल्लीं आनी तातूंत सरकार आनी बंडखोरांची चकमक जावंक ना जाल्यारुच अजाप. फाटल्या सप्टेंबर सावन इराणांत 530 आंदोलक मेल्यात. जाल्यार 20 हजार लोकांक अटक जाल्या. कडवे विचारसरणेक इराणाची अवस्था इराक, सिरीया, अफगाणिस्ताना सारकी जावपाचे वाटेर आसा. हेर देशांनी हाचे पसून बोध घेवंक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
