भांगरभूंय | प्रतिनिधी
पंजाब किंग्सान आदलो वस्ताद गुजरात टायटन्साक 3 विकेटींनी हारयलो. गुजरातान दिल्ली 200 धांवड्यांची मोख पंजाब किंग्सान 19.5 ओव्हरींनी 7 विकेटी वगडावन मेळयली.
स्टार बॅट्समन अपेशी थारिल्ल्यान पंजाब किंग्सान जैताची आस्त सोडिल्ली. पूण, शशांक सिंग आनी आशुतोष शर्मा (इम्पॅक्ट प्लेयर) ह्या युवा खेळगड्यांनी गुजराताक घाम काडलो. ह्या दोगांयनी 22 बॉलांनी मॅच विनींग 43 धांवड्यांची भागिदारी केली. शशांकान अर्द शेंकड्याची नोंद करून जैतांत म्हत्वाचें योगदान दिलें. ताणें 29 बॉलांनी स चवके आनी चार सक्यांचे मजतीन नाबाद 61 धांवड्यो केल्यो, जाल्यार आशुतोषान 31 धांवड्यांची खेळी केली. ताणें 17 बॉलांनी तीन चवके आनी एक सको मारलो. अंदूंचे आयपीएलांत व्हड धांवसंख्येचो येसस्वी रितीन फाटलाव करपी पंजाब पयलो पंगड थारलो.
ते आदीं मुखेली शुभमन गिलान परतून एकदा जबरदस्त खेळी करून गुजरात टायटन्साक निर्धारीत 20 ओव्हरींनी 4 विकेटी व्हगडावन 199 धांवड्यां मेरेन मजल मारून दिली.
केन विलियम्सनान बरी बॅटींग केली. पूण, ताचो वेग संथ आशिल्लो. ताची भरपाय साई सुदर्शनान ताचो उणाव भरून काडटना ताबडतोड खेळी केली. राहुल तेवातियान अखेरच्या ओव्हरींनी धांवड्यांचो वेग वाडयलो.
ते पयलीं फास्ट बॉलर कगिसो रबाडा परतून एकदा गुजरात टायटन्सा खातीर धोक्याचो थारलो. ताणें वृद्धिमान साहाक (11) बाद केलो. गील आनी विलियम्सन हाणें डाव सांबाळ्ळो खरो. पूण, तांच्या धांवड्यांचो वेग जाय आशिल्लो तसो नासलो. हरप्रीत ब्रारान 40 धांवड्यांची भागिदारी विलियम्सनाक (26) बाद करून फोडली. पूण, ते उपरांत साई सुदर्शनान धांवड्यांचो वेग वाडयलो. ताणें सिकंदर रजाची बॉलींग फोडून काडली. साई 19 बॉलांनी स चवक्यांचे मजतीन 33 धांवड्यो करून कॅच बाद जालो.
आयपीएलांत सगल्यांत वेगान तीन हजार धांवड्यो पुर्ण करपी भारताच्या बॅट्समनांचे वळेरेंत शुभमन दुसरे सुवातेर पावलो. लोकेश राहुलान 80 डावांनी हो पांवडो हुपिल्लो. जाल्यार गिलाक 92 डाव लागले.
गुजरात टायटन्सा वतीन 1500 परस चड धांवड्यो करपी गील पयलो बॅट्समन थारलो. ताच्या उपरांत हार्दिक पांड्या (833) आनी डॅव्हिड मिलर (817) हांचो क्रमांक लागता.
मजगतीं, विजय शंकर (8) परतून अपेशी थारलो. रबाडान मॅचींतली आपली दुसरी विकेट घेतली. राहुलान 8 बॉलांनी तीन चवके आनी एका सक्याचे मजतीन नाबाद 23 धांवड्यो केल्यो. शुभमनान 48 धांवड्यांनी स चवके आनी चार सक्यांचे मजतीन नाबाद 89 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
