शणै गोंयबाब जयंती निमतान दिवचले मुख्यमंत्री डाॅ. प्रमोद सावंत हांचो भोवमान

भांगरभूंय | प्रतिनिधी

दिवचल ः गोवा कोंकणी अकादमी आनी दिवचल कोंकणी सेवा केंद्र हांच्या जोडपालवान कोंकणी म्हापुरुस शणै गोंयबाब हांचे 149 वे जयंती निमतान मंगळारा 23 वेर सकाळीं साडेणव ते सांजवेळा पांच मेरेन कार्यावळ आयोजीत केल्या. हिराबाई झांट्ये मेमोरियल हाॅलांत ती जातली. हे कार्यावळीक लायन्स क्लब आॅफ बिचोलीमचो पालव मेळ्ळा. दिवचल कोंकणी सेवा केंद्राचे अध्यक्ष डाॅ. प्रवीण सावंत, रुपेश ठाणेकार, रुपेश ठाणेकार, विनायक गोवेकार, राजेंद्र उसपकार, सदाशिव वालावलकार, श्याम फातर्पेंकार, मयूर प्रभुगांवकार हांणी पत्रकार परिशदेंत दिली.
उक्तावण लोककला जाणकार पद्मश्री विनायक विष्णू खेडेकार हांचे हस्तुकीं जातलें. मुखेल सोयरे म्हूण मुख्यमंत्री डाॅ. प्रमोद सावंत हाजीर आसतले. तर आमदार डाॅ. चंद्रकांत शेट्ये मानाचे सोयरे आसतले. कार्यावळीच्या अध्यक्षस्थानाचेर गोवा कोंकणी अकादेमीचे अध्यक्ष डाॅ. पूर्णानंद च्यारी आसतले.
कोंकणी खातीर योगदान दिल्ले खातीर मुख्यमंत्री डॉ. सावंत हांचो विशेश भोवमान जातलो.
डिचोली कोंकणी सेवा केंद्राचे अध्यक्ष डॉ. प्रवीण सावंत हे संस्थाध्यक्ष म्हणून कार्यभार सांबाळटले. विजयानंद ज्ञानप्रसारक संस्था, मयेचे अध्यक्ष रूपेश नारायण ठाणेकार हे कार्याध्यक्ष आसतले. हांचे भायर उद्येजक वल्लभ साळकार, गोवा कोंकणी अकादेमीचे सचिव पराग नगर्सेकार तशेंच लायन्स क्लबाचे अध्यक्ष केतन आमोणकार हे खाशेले आमंत्रित म्हणून उपस्थित रावतले.
दनपरां 3.15 वरांचेर समारोप सत्राचें आयोजन केलां. ह्या सत्रांत गोवा विद्यापीठाचे उप-अधिश्ठाता डॉ. हनुमंत चोपडेकार हे मुखेल सोयरे म्हणून उपस्थित रावतले. समारोप सत्राच्या अध्यक्षस्थानार डॉ. पूर्णानंद च्यारी आसतले. गोवा कोंकणी अकादमीचे उपाध्यक्ष रमेश घाडी तशेंच डिचोली कोंकणी सेवा केंद्राचे उपाध्यक्ष विठ्ठल वेर्णेकार हे विशेश निमंत्रित म्हणून सहभागी जातले.
सकाळीं 11 वरांचेर नव्या युगांत कोंकणी सेवा संस्थां मुखावयलीं आव्हानां हो परिसंवाद जातलो. अध्यक्षस्थानाचेर पांडुरंग नाडकर्णी आसतले. हातूंत अनिल वेर्णेंकार, विठ्ठल आवंदियेकार, आकाश गांवकार आनी सौ. अरुणा रा. पाटणेकार वांटो घेतलीं.
12 वरांचेर गोंयची कला आनी साहित्य हाचेर प्रस्नमंच जातलो. हातूंत हायस्कूलांतले विद्यार्थी वांटो घेतले. 2 वरांचेर कोंकणी रेकाॅर्डेड ग्रूप नाच सर्त जातली. हातूंत विद्यापीठ, म्हाविद्यालयां, हायर सेकंडरीचे विद्यार्थी वांटो घेतले. 3.15 क धावे, बारावेक दिवचल म्हालांत कोंकणी विशयांत दर विद्यालयांत पयले आयिल्ल्या विद्यार्थ्यांक इनामां भेटयतले.
संपर्का खातीर डाॅ. प्रवीण सावंत 96373 96479, राजेंद्र उसपकार 90757 19929 हांचे कडेन संपर्क करचो, अशें कळीत केलां.
शणै गोंयबाब हांच्या साहित्यिक आनी भाशिक योगदानाचो भोवमान करपाक आयोजित केल्ल्या ह्या उत्सवाक साहित्यमोगी, शिक्षक, विद्यार्थी आनी नागरिकांनी व्हड संख्येन उपस्थित रावचें, अशें आवाहन आयोजकांनी केलां.