भांगरभूंय | प्रतिनिधी
नुस्तेकारांनी कृष्णा साळकार हांकां भेटयलें निवेदन
भांगरभूंय । प्रतिनिधी
वास्कोः फाटल्या दोन वर्सां सावन व्हॅटा वयलें अनुदान मेळूंक नाशिल्ल्यान आमचे मुखार कांय समस्या उब्यो रावल्यात. तें अनुदान मेळोवन दिवचें, अशी मागणी करपी निवेदन वास्को फिशींग बोट धनयांनी वास्कोचे आमदार कृष्णा साळकार हांकां दिलें.
ह्या प्रकरणांत आपूण संबंदितां सयत बेगिनूच मुख्यमंत्री डॉ. प्रमोद सावंत हांची भेट घेवन तांचे मुखार हो प्रस्न मांडटलो, अशें आस्वासन साळकार हांणी दिलें.
डिझॅला वयल्या व्हॅटाची रकम परतून दिवपाची येवजण तेन्नाचे मुख्यमंत्री मनोहर पर्रीकार हांणी सुरू केल्ली. ताका लागून नुस्तेकार भावांक थाकाय मेळिल्ली, पूण कांय कारणांक लागून व्हॅटा वयल्या अनुदानाची रकम दोन वर्सांच्यान नुस्तेकार भावांक मेळूंक ना. ताका लागून वास्को फिशींग बोट धनयांनी आमदार साळकार हांची भेट घेवन तांचे मुखार आपलो प्रस्न मांडलो.
तें अनुदान मेळूंक नाशिल्ल्यान ल्हान बोट धनयांक त्रास सोंसचो पडटा. डिझॅला खातीर पयशे खर्च करचे पडटात. आतां दर्यांत नुस्तें मेळपूय उणें जालां. आमचो हो परंपरीक वेवसाय आसा. तो आमी कसो तरी चालू दवरला. फुडारांत तो चालू उरचो, हे खातीर आमकां कितें तरी मजत करात, अशी विनवणी नुस्तेकार भावांनी केल्या. साळकार हांणी सांगलें, प्रधानमंत्री नरेंद्र मोदी हांणी व्होकल फॉर लोकल हाका उर्बा दिवपाचें धोरण आपणायलां. ते प्रमाण थंयच्या थळाव्या आनी परंपरीक वेवसायाक उर्बा दिवपाची गरज आसा. त्या नुस्तेकार भावांचें अनुदान कित्याक दिवंक ना, हाची म्हायती आपूण घेतलो. तशेंच तांचे हेर प्रस्न लेगीत सोडोवपाचो आपूण यत्न करतलों, अशें साळकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.