भांगरभूंय | प्रतिनिधी
पणजीः गोंयच्या नामनेच्या म्हाविद्यालयांत मीरामार-पणजेच्या ‘व्ही. एम. साळगांवकर कॉलेज ऑफ लॉ’ कॉलेजीत वेगवेगळ्या विशयांच्या सहाय्यक प्राध्यापक पदां खातीर भरती जाहीर केल्या. पात्र उमेदवारां खातीर 22 जूनाक थेट मुलाखत म्हळ्यार वॉक इन मुलाखतीचे आयोजन केल्या.
समुपदेशक: ह्या पदा खातीर उमेदवारा कडेन मानसशास्त्र, मनीस विकास वा वेलनेस काउन्सिलिंगांत उण्यांत उणे 55% गुणां सयत पदव्युत्तर पदवी आसपाक जाय. तशेंच कोंकणी भाशेचें गिन्यान सक्तीचें आसा. क्लिनीकल वा समुपदेशन मानसशास्त्रांत तज्ञ, एक वर्साचो अणभव आनी मराठी भाशेचें गिन्यान आशिल्ल्या उमेदवारांक प्राधान्य दितले. इत्सूक उमेदवारांनी जायरात उजवाडाक आयिल्ल्या तारखे सावन 15 दिसां भितर गरजेच्या प्रमाणपत्रां सयत आपलो सविस्तर अर्ज म्हाविद्यालयाक सादर करचो.
कायदो (LAW) विशयांत वट्ट 05 पदां तातुंतली 3 पदां ओबीसी खातीर आनी 2 उक्तो वर्ग खातीर आसात. अर्थशास्त्र विशयांत 04 पदां तांतुतली एसटी खातीर २ आनी उक्तो वर्ग खातीर 2 पदां आसात. इंग्लीश विशयांत 04 पदां तांतुतली उक्तो वर्ग खातीर 3 आनी एसटी खातीर 1 पद आसा. राज्यशास्त्र विशयांत 03 पदां. इतिहास विशयांत उक्तो वर्ग खातीर 04 पदां आनी पर्यावरणशास्त्र विशयांत उक्तो वर्ग खातीर 02 पदां आसात.
पात्रताय आनी अटीः प्राध्यापक पदा खातीर संबंदीत विशयांत उण्यांत उणे 55% गूण मेळोवन पदव्युत्तर पदवी आसप आनी नेट वा सेच परिक्षा पास जाल्ली आसप सक्तीचें आसा. पगार प्रमाण आनी सेवा अटी गोंय विद्यापीठ, उच्च शिक्षण संचालनालय (डीएचई) आनी पर्वरेच्या सक्षम प्राधिकरणांच्या नेमा प्रमाण आसतले.
इत्सूक उमेदवारांनी 22 जून 2026 दिसा सकाळीं 10:00 वरांचेर अर्जाची प्रत (नांव, पत्तो, जल्म तारीक, शिक्षणीक पात्रताय, अणभव आदी) तशेंच अर्जाची प्रत आनी यत्ता धावे सावन सगळ्यो गूणपत्रीका, 15 वर्सां गोंय राबितो दाखलो आनी कोंकणी भाशेच्या गिन्यानाचे प्रमाणपत्र घेवन म्हाविद्यालयांत मुलाखती खातीर हाजीर रावपाचो उलो प्राचार्यांनी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
