भांगरभूंय | प्रतिनिधी
राज्यांत मतमेजणेची तयारी निमण्या पांवड्यार
पणजी, प्रतिनिधी : लोकसभा वेंचणुकेंत दरेकी विधानसभा मतदारसंघांतल्या 5 मतदान केंद्रांतल्या व्हीव्हीपॅट स्लीपींची मतमेजणी जातली. म्हणटकच उत्तर गोंय तशेच दक्षीण गोंय लोकसभा मतदारसंघात दरेकी 100 मतदान केंद्रांतल्या व्हीव्हीपॅट स्लीपींची मेजणी जातली. हाका लागून लोकसभा वेंचणुकेच्या निकालाक कळाव जावपाची शक्यताय आसा.
पुराय देशात लोकसभा वेंचणुकेची मतमेजणी मंगळारा 4 जुनाक जातली. गोंयांत उत्तर गोंय लोकसभा मतदारसंघांची मतमेजणी सरकारी तंत्रनिकेतन, आल्तिनो जातली. दक्षीण गोंय लोकसभा मतदारसंघाची मतमेजणी दामोदर म्हाविद्यालय, मडगांवां जातली. मतमेजणी खातीर कर्मचारी, सुरक्षा तशेच हेर सुविधा हांची तयारी नेटान सुरू आसा, अशी म्हायती जोड मुखेल वेंचणुक अधिकारी त्रिवेणी वेळीप हांणी दिली.
मतमेजणी सकाळीं 8 वरांचेर सुरू जातली. पयलीं पोस्टल मतांची मेजणी जातली. इलेक्ट्रॉनिक मतदान यंत्रांक लागून मतमेजणी बेगिन जातली. तरीय दरेकी विधानसभा मतदारसंघातल्या 5 मतदान केंद्रांतल्या व्हीव्हीपॅट स्लीपींची मेजणी सक्तीची आसा. व्हीव्हीपॅट स्लीपींची मतमेजणी जावचे पयली निकाल जाहीर करपाक मेळचो ना. हाका लागून निकालाक उशीर जावप शक्य आसा. तरीय 11 ते 12 मेरेन निकाल जाहीर जातलो, अशें वेळीप हांणी सांगलें.
सात फेरयांनी मतमेजणी
दोनूय मतदारसंघांनी दरेकी सात फेरयांनी मतमेजणी जातली. उत्तर गोंय मतदारसंघाची मतमेजणी 157 जाल्यार दक्षीण गोंय मतदारसंघाची मतमेजणी 161 टेबलांचेर जातली. उत्तर गोंय मतदारसंघां खातीर 706 जाल्यार दक्षीण गोंय मतदारसंघा खातीर 651 सुरक्षा रक्षकांची वेवस्था आसतली. उत्तर गोंय मतदारसंघा खातीर 1793 जाल्यार दक्षीण गोंय लोकसभा मतदारसंघा खातीर 1797 कर्मचाऱ्यांची वेवस्था आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
