भांगरभूंय | प्रतिनिधी
चीन, खबरां संस्था ः सोशल मिडियाचेर व्हिडियोक व्ह्यूज मेळोवपा खातीर एका तरणाट्यान 4 हजार 600 मोबायल फोन विकतें घेतले अशीं अजाप करपी घडणूक मुखार आयला. विशेश म्हळ्यार ह्या माध्यमांतल्यान ह्या तरणाट्यान चार म्हयन्यांत तीन कोटी रुपया जोडल्यात. मजगतीं, पुलिसांनी ह्या तरणाट्याचेर कारवाय करून ताका अटक केल्या.
एका खबराच्या अहवाला प्रमाण चीनांतल्या एका तरणाट्यान व्हिडियो आनी लायव्ह स्ट्रीमिंग खातीर व्ह्यूज मेळोवपा खातीर सुमार 4,600 मोबायल फोन विकतें घेतले. त्या तरणाट्याचें नांव वांग अशें आसा. तांणी 2022 वर्सा एक कंपनी स्थापन केल्ली. ह्या कंपनी वरवीं तो जायत्या जाणांक तांच्या व्हिडियो आनी लायव्ह स्ट्रीमिंगा व्यूज मेळोवन दितालो. हे खातीर ह्या तरणाट्यान मोबायला भायर राऊटर आनी व्हीपीएनय विकते घेतिल्ले.
हो तरणाटो व्हिडियो आनी लायव्ह स्ट्रीमिंग खातीर व्यूज मेळोवपा खातीर एकाच वेळार सगळ्या मोबायलाचेर व्हिडियो आनी लायव्ह स्ट्रीमिंग सुरू करतालो, हाचे वरवीं तांणे चार म्हयन्यांत तीन कोटी रुपया जोडले. गिरायकाक जाय आशिल्ल्या व्ह्यूज आनी वॉचटायमाचेर आदारून तो गिरायकां कडल्यान पयशे घेतालो. वांग हाच्या मतान मदीं ताचे सोशल मिडिया खातें खूबदां बंद जाताले. पूण नोंदणी प्रक्रिया सोपी आशिल्ल्यान तो परतून नवे खातें उगडटालो.
मजगतीं, ह्या प्रकरणांत पुलिसांनी ह्या तरणाट्याचेर कारवाय केल्या आनी बेकायदेशीर वेवसाय केल्ल्याच्या आरोपांत ताका अटक केल्या. तशेंच ताका सात हजार डॉलर दंडय सांगला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
