व्हाळशी, दिवचले रस्त्याचेर पालसण कोसळिल्ल्यान येरादारीक आडखळ
भांगरभूंय | प्रतिनिधी
दिवचल, प्रतिनिधी: व्हाळशी, दिवचले रस्त्याचे एके वटेन व्हड पालसण कोसळिल्ल्यान एके वटेनचे येरादारीक आडखळ निर्माण जाल्या. पालसण कोसळटना त्या रस्त्यान वचपी एक दुचाकी चालक वाटवलो. हे विशीं म्हायती मेळटाच आमदार डॉ. चंद्रकांत शेट्ये, आमदार प्रेमेंद्र शेट, नगराध्यक्ष, थळावे नगरसेवक तशेंच अधिकार्यांनी हांगा येवन पळोवणी केली.
व्हाळशी वाठारांत रस्त्याचे देगेक एक व्हड दोंगर आशिल्ल्यान तो कोसळपाचो भंय आदींय उक्तायल्लो. हे विशीं कांय दिसां पयलीं आमदार डॉ. शेट्ये हांणीय खात्याक म्हायती दिल्ली. फाटले दोन दीस पडपी पावसाक लागून पालसणां कोसळ्ळीं. तीं परत कोसळपाचो भंय नागरीकांनी उक्तायला.
डॉ. शेट्ये हांणी, हे घडणुके विशीं खर तिडक उक्तायली. कंत्राटदार तशेंच संबंदीत खात्याच्या अधिकार्यांनी पालसण तशेंच जंय धोको आसा थंय सगळ्यांत चड जतनाय घेवप गरजेचें. मात तशें करिनासतना रस्तो सुरक्षीत आशिल्ल्याचें सांगून ह्या रस्त्याचें उक्तावणूय जालें. व्हड अपघात जावपा पसून वाटवलो. रस्तो सुरक्षीत जायसर आपूण फाटपुरवण करतलों अशें तांणी सांगलें.
हांगा सगळें सुरक्षीत जायसर एके वटेनची येरादारी बंद दवरची, तशेंच लोकांक हाचो त्रास जावचो ना हाची जतनाय घेवपाची मागणी ह्या वेळार लोकांनी केली.
नगरसेवक रंजना वायंगणकार हांणी पालसणां विशीं खात्याक कल्पना दिल्ली. मात ताचे कडेन आडनदर केल्ल्यान आयज ही परिस्थिती निर्माण जाली अशें तिणें सांगलें. नगराध्यक्ष कुंदन फळारी, दीपा पळ ,विजयकुमार नाटेकार, अनिकेत चणेकार, निलेश टोपले आनी हेर नगरसेवकांनी हांगा भेट दिवन पळोवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
